Alaksandr Łukašenka pryznačyŭ hałoŭnym navukovym sakratarom Nacyjanalnaj akademii navuk 35-hadovaha doktara chimičnych navuk Andreja Ivanca. Čym jon admietny?
Andrej Ivaniec. Fota tvr.by.
U hetaha čałavieka była idealnaja bijahrafija. Vučyŭsia Ivaniec u niezvyčajnym kłasie, jon mieŭ paradkavuju litaru «U» (pa-rusku «paskorany»), try hady navučańnia jany skončyli za dva, potym pastupiŭ u Licej BDU. Kali byŭ školnikam, zajmaŭ treciaje miesca na mižnarodnaj alimpijadzie pa chimii.
Chłopiec skončyŭ chimičny fakultet BDU (2006), paśla čaho pastupiŭ u aśpiranturu Instytuta ahulnaj i niearhaničnaj chimii Akademii navuk. U 2009-m abaraniŭ kandydackuju dysiertacyju «Sintez i ŭłaścivaści miembranna-sarbcyjonnych materyjałaŭ na asnovie kryštaličnaha dyaksidu kremniju». U 2017-m — doktarskuju.
Ivaniec dvojčy stanaviŭsia łaŭreatam śpiecyjalnaha fondu prezidenta dla padtrymki talenavitaj moładzi. U 2009 atrymaŭ stypiendyju prezidenta dla talenavitych aśpirantaŭ. Andrej byŭ staršynioj Rady maładych navukoŭcaŭ NAN.
Andrej Ivaniec žanaty. Razam z žonkaj Chryścinaj jany hadujuć traich dziaciej: Jafima, Jelizara i Arynu.
Aproč chimii, u Ivanca jość jašče adna zachapleńnie — heta paŭerliftynh. Heta svojeasablivy vid ciažkoj atletyki. U Ivanca až 22 rekordy siarod junijoraŭ i 5 rekordaŭ siarod darosłych. Jon zajmaŭ pryzavyja miescy na čempijanatach śvietu i Jeŭropy pa paŭerliftynhu.
«Hety vid sportu dazvoliŭ mnie raskrycca ŭ poŭnaj miery. Ja nie zusim razumieŭ tady pryrodu svajho azartu, ale mnie nievierahodna chaciełasia padymać ŭsio bolš i bolš, pakazvać usio lepšyja vyniki i pieramahać na spabornictvach», — kazaŭ Ivaniec.
U Biełarusi paŭerliftynham aktyŭna zajmaŭsia i tak zvany «baciuška sa svastykaj» Kanstancin Burykin. Śviatar z Hatava, były duchoŭnik RNIE, aktyŭny prychilnik «ruskaha śvietu» Burykin stvaryŭ pry prychodzie kłub pa paŭerliftynhu «Biełaja Ruś». Praź niejki čas jon staŭ namieśnikam kiraŭnika fiederacyi paŭerliftynha, faktyčna kirujučy ŭsimi spravami.
Toj samy Kanstancin Burykin.
Mienavita na hetaj linii adbyłosia znajomstva Ivanca i Burykina. Historyju adnosin apisaŭ sam Burykin u supołcy Pravasłaŭnaha duchoŭna-spartyŭnaha centra «Biełaja Ruś». Burykin pisaŭ, što Andrej Ivaniec i Siarhiej Bochan źviarnulisia da jaho ŭ 2010 hodzie z prapanovaj padtrymać kandydaturu Ivanca na vybarach kiraŭnika federacyi paŭerliftynha.
«Paru hadoŭ my rehularna kamunikavali, jany časam pryjazdžali ŭ Hatava na nabaženstvy, brali dabrasłavieńnie na spabornictvy», — pisaŭ Burykin.
U 2012 Ivaniec prasiŭ u Burykina dapamohi na padrychtoŭku da čempijanatu śvietu ŭ Suzdali. Im treba była $1 tysiača dla spartyŭnaha charčavańnia i farmakałohii. Burykin skazaŭ, što takuju sumu znojdzie ŭ carkvie. Uzamien jon prapanavaŭ Ivancu stać tvaram «Biełaj Rusi».
«Pakazaŭ Andreju i Siarhieju, jak vystupaje rasijski spartsmien Fiodar Jemieljanienka, jak jon siabie ścipła, pa-chryścijansku viadzie, prapavieduje dobryja spravy, prasłaŭlaje svaju radzimu i vieru, za ŭsie pieramohi dziakuje Bohu i Rasii. Patłumačyŭ, što ad jaho patrabujecca niešta padobnaje, ale z akcentam na naš vid sportu. Andrej — čałaviek vierujučy, ale nie ucarkoŭleny, nijakaj pakaznoj relihijnaści nam nie treba», — pisaŭ Burykin.
Ivaniec zhadziŭsia na takoje. Burykina zapisali navat druhim trenieram Ivanca. Potym Burykin prapanavaŭ spartsmienu źniać rolik da «mužčynskaha śviata» 23 lutaha, ale Ivaniec admoviŭsia. Maŭlaŭ, kiepski znak pierad spabornictvami. Paśla hetaha i pačalisia prablemy, Burykin zapatrabavaŭ viarnuć hrošy. Bochan sapraŭdy ŭ chutkim časie ich viarnuŭ. Paśla hetaha Burykin tolki palivaŭ brudam čałavieka, jakoha chacieŭ zrabić tvaram svajho kłuba.
Kanstancin Burykin byŭ asudžany da 3 hadoŭ źniavoleńnia za niezakonnaje zachoŭvańnie zbroi i bojeprypasaŭ.
