U Breście pierapachavali pareštki 1 214 jaŭrejaŭ, znojdzienyja ŭ studzieni-sakaviku 2019 hoda padčas budaŭnictva elitnaha kvartała ŭ centry horada, piša «Briestskaja hazieta».
Žałobnaja cyrymonija prajšła dniom 22 maja na Paŭnočnych mohiłkach pad Brestam la pamiatnaha znaka, dzie raniej byli pachavanyja reštki 1 549 jaŭrejaŭ, pa-źviersku zakatavanych fašystami ŭ hady vajny.
Udzieł u cyrymonii ŭziali kiraŭnictva horada, pradstaŭniki dypłamatyčnych misij Hiermanii, Polščy, Rasii, ZŠA, Ukrainy, Čechii i inšych krain, členy jaŭrejskich hramadskich abjadnańniaŭ i iudziejskich relihijnych hramad Izraila i Biełarusi i inšyja.
«Ciapier na hetym miescy my robim pierapachavańnie čaścinki našaha serca, čaścinki svajoj mahčymaj budučyni. Škada ludziej. Škada dziaciej, što nie naradzilisia. Kim by jany ni stali, kali b byli žyvyja <…> Aficyjna chaču zajavić: my i nadalej budziem praciahvać u Breście rabotu pa ŭšanavańni achviaraŭ Chałakostu. Heta našy pryncypy, heta pryncypy našaj dziaržaŭnaj palityki», — skazaŭ staršynia Bresckaha harvykankama Alaksandr Rahačuk.
Kiraŭnik Rady biełaruskich hramadskich abjadnańniaŭ i hramad Uładzimir Čarnicki ad imia staršyni Suśvietnaha jaŭrejskaha kanhresa Ronalda Łaŭdara padziakavaŭ biełaruskim uładam za toje, što jany «paśla ŭsich chvalavańniaŭ nakont praviadzieńnia budaŭnictva na hetym učastku, uziali na siabie maralnuju adkaznaść za zabieśpiačeńnie naležnaha hodnaha pierapachavańnia bolš za tysiaču reštkaŭ achviaraŭ Chałakostu», znojdzienych u centry Bresta.
