Druhi hod zapar asnoŭny ŭładalnik kampanij «Santa Bremar» i «Savuškaŭ pradukt» Alaksandr Mašenski ŭznačalvaje top-200 paśpiachovych i ŭpłyvovych biźniesmienaŭ Biełarusi, jaki štohod składaje partał «Štodziońnik».
Lidar rejtynhu Alaksandr Mašenski letaś staŭ chedłajnieram samych značnych M&A-ździełak na biełaruskim rynku. Pryčym bieraściejec «adznačyŭsia» adrazu ŭ dvuch jaho siehmientach — u małakapierapracoŭčym i ŭ roźnicy.
Alaksandr Mašenski.
Kab reanimavać svaju daŭniuju ideju stvareńnia nacyjanalnaj małočnaj kampanii, jakaja na hety raz padtrymana ŭładami, na praciahu 2018 hoda Alaksandr Mašenski atrymaŭ kantrol nad dvuma bujnymi dziaržaŭnymi małakapierapracoŭčymi pradpryjemstvami — u Biarozie i Oršy. Nastupnaj jaho metaj źjaŭlajecca Baranavicki małočny kambinat, akcyi jakoha biznesmien skuplaje ŭ hetym hodzie. Biznesmien nie vyklučaje, što małočny prajekt u chutkim časie moža vyjści na mižnarodny ŭzrovień. Pavodle jaho słoŭ, kampanija pa-raniejšamu razhladaje prapanovy ab inviestycyjach u greenfield i ab kupli dziejnych biznesaŭ na rynkach prysutnaści — u Rasii i Ukrainie. Darečy, na rasijskim rynku abjadnany biznes «Savuškavaha pradukta», «Santa Bremara» i rybapierapracoŭčaha vytvorčaha aktyvu «Ruskaha mora» zajmaje druhoje miesca pa vyručcy (pa dadzienych na 2017 hod) siarod kampanij ź biełaruskim kapitałam. Vyšej tolki BiełAZ, a kampanii Alaksandra Mašenskaha apiaredžvajuć pa prodažach daččynyja struktury BMZ, «Biełnaftachima», MTZ, MAZ, Biełaruskaj naftavaj kampanii i «Biełarusnafty».
U roźnicy biznesmien letaś atrymaŭ kantrol nad kramami «Rubloŭski». Ździełka dazvoliła ŭvajści nie tolki na staličny rynak, dzie ŭ asnoŭnym kancentrujucca kramy hetaj sietki, ale i ŭ top-5 najbujniejšych retejleraŭ krainy.
Čytajcie. Alaksandr Mašenski: historyja žyćcia hałoŭnaha małočnika Łukašenki
Druhoje i treciaje miescy ŭ abnoŭlenym topie zaniali Arkadź Dobkin i Viktar Kisły, u top-10 upieršyniu ŭvajšoŭ Viktar Prakapienia. U cełym kolkaść pradstaŭnikoŭ IT-siektara i inviestaraŭ u jaho vyrasła.
Nielha nie zaŭvažyć ryŭka «maładych ilvoŭ», da jakich adnosiać Alaksieja Aleksina i Alaksandra Zajcava. I kali Alaksiej Aleksin viadomy daŭno i tolki ŭmacavaŭ pazicyi, staŭšy hałoŭnym bienieficyjaram pa niekalkich ukazach prezidenta (pa tytuni i mytnym servisie), to Alaksandr Zajcaŭ na hety raz pasunuŭ u śpisie mnohija fakturnyja fihury. Biznesmien za vielmi karotki termin stvaryŭ kanhłamierat, u jaki ŭvachodziać aktyvy ŭ łahistycy, uhnajeńniach, hornarudnaj halinie, sporcie i navat u vytvorčaści ŭzbrajeńniaŭ. Jaho kampanii — adny z hałoŭnych pravadyroŭ intaresaŭ Biełarusi na afrykanskim kantyniencie.
Rejtynh pašyryŭsia za košt niekalkich novych proźviščaŭ biznesmienaŭ, jakija majuć pašparty hramadzianina Biełarusi, ale ŭ asnoŭnym pracujuć na susiednich rynkach — u Rasii i Ukrainie. Pa proźviščach ŭ cełym novy top-200 abnaviŭsia bolš čym na čverć.
