Pryčynaj moža stać śviadomaje vykarystańnie chłorarhaničnych złučeńniaŭ dla pavieličeńnia addačy parafinistaj nafty z płastoŭ.

Były ŭładalnik rasijskaj naftavaj kampanii «JUKOS» Michaił Chadarkoŭski vykazaŭ u siabie ŭ fejsbuku mierkavańnie z nahody pastavak niajakasnaj nafty pa naftapravodzie «Družba», u vyniku čaho było paškodžanaje darahoje abstalavańnie na biełaruskich zavodach. Prablema, jak miarkujecca, paŭstała na dobra viadomaj Chadarkoŭskamu ŭrezcy ŭ mahistral u Samarskaj vobłaści («Samaranieftiehaz», były «JUKOS», ciapier «Rasnafta»).

Biznesmen nahadaŭ, što ŭ mai 2012 hoda ministr enierhietyki RF Siarhiej Šmatko admianiŭ zabaronu na vykarystańnie chłorarhaniki dla pavyšeńnia naftaaddačy płastu. «Na samarskich radoviščach z parafinistaj naftaju chłorarhanika moža dać salidnuju prybaŭku», — adznačaje jon.

Michaił Chadarkoŭski vykazaŭ zdahadku, što ŭ tym rajonie «na chłorarhaniku naftu nie praviarajuć». «Na vuźle ŭliku ŭ Samary (maleńkim i sielskim) mohuć prahapić zachod nafty ź vialikaj dolaj prymiešak, a mohuć pryniać naŭmysna, bo spračacca ź siečynskimi sabie daražej. Kampanii vyhadna nie da kanca ačyścić śvidravinnuju vadkaść, bo ŭlik idzie pa abjomie», — piša Chadarkoŭski.

U toj ža čas jon zaścierahaje, što zarana niešta śćviardžać, pakul niama vynikaŭ rasśledavańnia.

Biźniesmien miarkuje, što reputacyi rasijskaj ekspartnaj sumiesi Urals naniesieny surjozny ŭdar. Heta adabjecca na dachodach usich rasijskich naftavych kampanij.

Pastaŭki nafty, zabrudžanaj chłorarhaničnymi złučeńniami, nanieśli značnuju škodu biełaruskim naftapierapracoŭnikam. Jaje pamier aceńvajecca i moža dasiahnuć niekalkich socień miljonaŭ dalaraŭ.

Rasśledavańniem kryminalnaj spravy pa pytańni zabrudžvańnia nafty ŭ «Družbie» ŭ Rasii zajmajecca śpiecsłužba FSB. Śledčyja dziejańni pa spravie prajšli ŭ ofisach šerahu pradpryjemstvaŭ. Rasijskija ŚMI nie vyklučali mahčymaści dyviersii. Pa viersii Chadarkoŭskaha, prablema była prosta ŭ niepradumanaj maksimizacyi zdabyčy.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?