Ułady Biełarusi admianili svajo raniejšaje rašeńnie ab niepadaŭžeńni dazvołu na słužeńnie ajcu Sabiesłavu Tamali z Salihorska.

Hetuju infarmacyju paćvierdziŭ «Našaj Nivie» v.a. pres-sakratara Kanfierencyi Katalickich Biskupaŭ u Biełarusi ksiondz Juryj Sańko.

Kaścioł atrymaŭ faks ad upaŭnavažanaha pa spravach relihii ab tym, što ajcu Sabiesłavu dazvoł na słužeńnie padoŭžany na paŭhoda. 

Paŭhoda — heta zvyčajny termin dla takoha padaŭžeńnia. Kaścioł zvyčajna prosić ab padaŭžeńni terminu pierabyvańnia na hod, a dazvoły vydajucca časam na hod, časam na paŭhoda, a časam na try miesiacy.

Vysyłka biełaruskamoŭnych ksiandzoŭ, choć i polskich hramadzian, vyklikaje niezadavolenaść viernikaŭ. Jak paviedamlała staršynia parafijalnaj rady kaścioła Śviatoha Franciška ŭ Salihorsku, pietycyju z pratestam suprać vysyłki a. Tamali padpisali bolš za 300 žycharoŭ horada. Adnačasova try sotni katalikoŭ Viciebska padpisali list pratestu suprać vysyłki ajca Paŭła Knurka.

Viciebčuki nie ŭsprymali a. Paŭła Knurka jak čužaziemca, bo «adpraŭlaŭ nabaženstvy, pramaŭlaŭ kazańni i razmaŭlaŭ ź ludźmi na dobraj biełaruskaj movie», — havorycca ŭ tym liście.

«My pierakananyja, što dla ludziej, jakija siejuć dabro, luboŭ i sapraŭdnuju vieru, Biełaruś pavinna zaŭsiody trymać dźviery adčynienymi. Z taho, što jany raptam začyniajucca pierad kimści, vynikaje, na naš pohlad, tolki škoda dy napružanaść u hramadstvie», — havaryłasia ŭ zvarocie viernikaŭ da ŭpaŭnavažanaha ŭ spravach relihii Leanida Hulaki.

Na pieradkaladnaj pres-kanferencyi biskup Viciebski Aleh Butkievič źviartaŭ uvahu na «peŭnyja składanaści z zaprašeńniem śviataroŭ z zamiežža, nie tolki z Polščy».

Vakansii śviataroŭ u Viciebskaj dyjacezii pakul niemahčyma kampiensavać ksiandzami-biełarusami. Na padrychtoŭčych kursach u duchoŭnaj sieminaryi navučajucca ciapier usiaho dva čałavieki z dyjacezii.

U toj ža čas za apošnija try hady (2016—2018) ułady nie dali anivodnaha dazvołu na słužeńnie ŭ Viciebskaj dyjacezii zamiežnikam — katalickim śviataram albo manaškam.

Za takimi krokami prahladajecca žadańnie ŭładaŭ źmienšyć u krainie ličbu ksiandzoŭ hramadzian Polščy. U toj ža čas, naprykład, pravasłaŭnym mitrapalitam źjaŭlajecca hramadzianin Rasii Pavieł (Panamaroŭ), choć pavodle zakona im musiŭ by być hramadzianin Biełarusi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?