Polskija pravaachoŭnyja orhany zatrymali arhanizatara kviestaŭ u Kašalinie, dzie ŭspychnuŭ pažar i zahinuła piać niepaŭnaletnich dziaŭčat. Pra heta paviedamiŭ na bryfinhu ŭ niadzielu hałoŭny kamiendant palicyi Polščy Jarasłaŭ Šymčyk, paviedamlaje policja.pl.

«Adrazu ž paśla trahiedyi my pryniali miery, nakiravanyja na vyznačeńnie asob, jakija zajmalisia hetaj dziejnaściu. 28-hadovy žychar Vielkapolskaha vajavodstva, raniej niesudzimy, byŭ zatrymany palicyjaj i dastaŭleny ŭ Kašalin», — skazaŭ Jarasłaŭ Šymčyk.

Siońnia buduć dapytany ŭładalnik i najomny rabotnik hetaha abjekta.

Pa słovach premjer-ministra Polščy Mateuša Maravieckaha, jaki ŭdzielničaŭ u bryfinhu, ciapier usio padobnyja ŭstanovy padviarhajucca dbajnym pravierkam, mnohija ź ich buduć zakryty.

U Polščy pracuje bolš za 1000 abjektaŭ typu escape room. Pavodle infarmacyi, atrymanaj ad hałoŭnaha kamiendanta dziaržaŭnaj pažarnaj słužby Lešeka Suskaha, učora vyjaŭleny parušeńni ŭ 178 takich miescach. Vyznačana bolš za 400 niedachopaŭ, źviazanych z praviłami evakuacyi, a 13 takich abjektaŭ było zakryta, 16 uładalnikaŭ aštrafavany. Pravierki buduć praciahnutyja.

Trahiedyja adbyłasia ŭ piatnicu viečaram u horadzie Kašalin na paŭnočnym zachadzie Polščy. Pažar uspychnuŭ u momant, kali ŭdzielniki znachodzilisia ŭ zakrytym pamiaškańni, ź jakoha jany pavinny byli vybracca, rašajučy hałavałomki. Pažarnyja prybyli na miesca ŭ momant, kali ahniom byŭ achopleny ŭvieś pieršy pavierch budynka.

«Papiarednija vysnovy śviedčać ab tym, što na abjekcie było šmat parušeńniaŭ. Abahravalnyja prybory, vierahodna, znachodzilisia zanadta blizka ad lohkaŭzharalnych materyjałaŭ. U pamiaškańni my taksama znajšli śviečki, tamu isnuje i vierahodnaść vykarystańnia adkrytaha ahniu», — infarmavaŭ Lešek Suski.

Pamiaškańnie escape room mieła płošču 7,3 kv. m. Tam znachodzilisia dva kresły i lampa. «Dla samich udzielnikaŭ miesca zastavałasia mała, — skazaŭ Lešek Suski. — Trahiedyja adbyłasia hałoŭnym čynam praz adsutnaść mahčymaści dla evakuacyi ludziej».

Zahinułym dziaŭčatam było pa 15 hadoŭ. Adzin mužčyna atrymaŭ ciažkija traŭmy. Jaho adpravili ŭ balnicu.

Spačuvańni blizkim zahinułych vykazaŭ ministr unutranych spraŭ Jachim Brudzinski. Jon taksama adznačyŭ pracu pažarnaj słužby. Z pradstaŭlenaj infarmacyi vynikaje, što pažarnaja achova vyjechała praz chvilinu z momantu atrymańnia zajaŭki. Na miescy była praź jašče 4 chviliny. «Na žal, pažarnyja prajhrali baraćbu za žyćcio hetych dziaŭčat. Nie praz adsutnaść prafiesijanalizmu, kampietentnaści i vopytu. Prajhrali jaje tym, chto, kirujučysia žadańniem atrymać lohki i chutki prybytak, vyrak na śmierć hetych dziaciej», — zajaviŭ Jachim Brudzinski.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?