Minski płanietaryj u hetym hodzie pačnie pakazvać śfieryčnyja filmy na biełaruskaj movie — pieršym pradublavany multfilm «Myšaniaty i Miesiac».
Premjerny pakaz filma zapłanavany na 5 i 6 studzienia, paviedamili karespandentu BiełTA va ŭstanovie.
«Biełaruskuju hukavuju darožku padrychtavała studyja, jakaja zajmałasia stvareńniem samaha multfilma. Darečy, heta taksama pieršy biełaruski film, stvorany śpiecyjalna dla pakazu na kupale. U našym płanietaryi jaho premjerny pakaz na ruskaj movie adbyŭsia ŭvosień 2017 hoda. Za hety čas film byŭ pierakładzieny na anhlijskuju, niamieckuju, francuzskuju i inšyja zamiežnyja movy. A ciapier biełaruskaja publika zmoža ŭbačyć jaho i na biełaruskaj movie, — patłumačyŭ kiraŭnik Minskaha płanietaryja Alaksandr Mikulič. —
Nastupnym zapłanavany dublaž filma «Maja. Naziralniki Suśvietu», ŭžo rychtujem jaho ŭ biełaruskaj viersii. I dalej majuć namier pierakładać najbolš papularnyja filmy».
«Myšaniaty i Miesiac» — heta historyja pryhod dvuch myšaniataŭ Pipa i Skrypa, jakija šukali adkaz na pytańnie, chto źjadaje syr u niebie,iaki śviecicca. Jany daviedalisia, što na samaj spravie heta Miesiac, jaki nielha źjeści. Zatoje na im jość mora biez vady, kratary i jašče šmat cikavaha. Takoha, što chočacca abaviazkova kali-niebudź tam pabyvać i pabačyć na svaje vočy. A pakul takoj mahčymaści niama — hladzieć praz teleskop. Minski płanietaryj zaprašaje maleńkich i darosłych u zajmalnaje padarožža na Miesiac.