«Svabodzie» pakazali ŭnikalnyja relikvii śviatych, samyja staražytnyja ź jakich adnosiacca da III stahodździa našaj ery. Ich znajšli ŭ kaściole Maci Božaj Škaplernaj u Miadzieli. Relikvii razam sa starymi metryčnymi knihami byli zamuravanyja ŭ kaścielnaj ścianie ŭ 1940-ja hady.
Znojdzienyja relikvii z sertyfikatami (u dalokim šerahu) i metryčnyja knihi.
«Viadoma, heta cud, što relikvija zachavałasia ŭ kaściole», — kaža ajciec Jury Kułaj, nastajaciel klaštara karmelitaŭ bosych u Miadzieli.
Na hetym tydni stała viadoma, što ŭ miadzielskim kaściole znajšli ŭnikalnyja relikvii i metryčnyja knihi. Jany byli zamuravanyja ŭ vierchniaj častcy ściany kaścioła.
Kaścioł u Miadzieli. Pabudavany ŭ 1754 hodzie.
Pra mahčymy tajnik stała viadoma jašče ŭ 2018 hodzie, kali archivist ordenu karmelitaŭ u Krakavie znajšoŭ zapisku manacha ź Miadzieła. U joj było napisana, dzie zamuravanyja relikvii. Minułaj vosieńniu rabočyja mianiali pravodku na vierchnim jarusie kaścioła i znajšli nišu z relikvijami śviatoj Cecylii, papy Rymskaha Hryhoryja I Vialikaha i śviatoj Terezy ad Dziciatki Jezusa. Usie jany byli pieradadzienyja kaściołu ŭ 1930-ja hady. Śviataja Cecylija ličycca apiakunkaj muzykaŭ. Jana žyła ŭ III stahodździ ŭ Rymie, naviartała pahancaŭ u chryścijanstva.
U tajniku akazalisia taksama metryčnyja knihi ab naradžeńni i šlubach pieršaj pałovy 19 stahodździa, a taksama z 1931 pa 1942 hod.
Relikvii znajšli ŭ ścianie na vierchnim jarusie kaścioła.
Relikvii z sertyfikatami zachoŭvalisia ŭ blašancy ad harbaty. Taksama tam była zapiska ad manacha:
«17 lutaha 1940 hode. Dziela zachavańnia ad apahańvańnia i vierahodnaha źniščeńnia».
Imia manacha, jaki schavaŭ relikvii i knihi, pakul nieviadomaje. Imavierna, jon zastavaŭsia ŭ Miadzieli da 1942 hodu, jakim datujucca apošnija zapisy ŭ metryčnaj knizie.
Moščy znachodziacca ŭ takich maleńkich medaljonach.
«Najbolš vierahodna, što heta byŭ adzin z bratoŭ ordena karmelitaŭ, — kaža ajciec Jury. — Śviatary vyjechali jašče da prychodu Savietaŭ. A manachi zastavalisia padtrymlivać parafiju».
Ajciec Jury Kułaj kaža, što da kanca nie było zrazumieła, ci zachavalisia relikvii ŭ kaściole. Za savieckim časam chram začynili i zrabili ŭ im skład chimičnych uhnajeńniaŭ.
Relikvii znachodzilisia ŭ skryncy ad harbaty.
«Nie było ŭpeŭnienaści, ci zachavałasia na samoj spravie. Bo kaścioł stolki hadoŭ stajaŭ biaz voknaŭ i dźviarej. Tut žach što rabiłasia. Navat trymali śviniej u časy Chruščova», — kaža ksiondz.
Znojdzienyja ŭ ścianie moščy naležać kaściołu. Dla ich nabuduć relikvaryj — admysłovuju skryniu dla zachavańnia — i buduć vymać u dni śviatych.
Ajciec Jury Kułaj
«Jany zastanucca tut, i vierniki buduć ich ušanoŭvać. Naprykład, dzień śviatoj Cecylii — 22 listapada», — skazaŭ ajciec Jury.
Metryčnyja knihi taksama pakul zastanucca ŭ kaściole.
Natatka ad nieviadomaha manacha, jaki schavaŭ relikvii ŭ 1940 hodzie.
Kaścioł u Miadziele byŭ zbudavany ŭ 1754 hodzie. Ad času zasnavańnia i pa siońnia jon naležyć ordenu karmelitaŭ. Chram maje asablivuju architekturu, bo byŭ sprajektavany na ŭzor kupała bazyliki Maci Božaj Škaplernaj na hary Karmel u Chajfie ŭ Izraili — mienavita tam zaradziŭsia orden karmelitaŭ u 12 stahodździ.
Kaścioł u Miadziele byŭ začynieny paśla Druhoj usiaśvietnaj vajny. Pieršaje nabaženstva paśla viartańnia chrama viernikam prajšło na śviata Božaha naradžeńnia ŭ 1989 hodzie.
