Ranicaj 31 śniežnia na tusovačnaj vulicy Zybickaj adbyłasia bojka, u vyniku čaho pamior 46-hadovy mužčyna. TUT.BY daviedaŭsia padrabiaznaści zdareńnia.

Trahiedyja adbyłasia dzieści na hetym učastku vulicy. Fota: Stanisłaŭ Šaršukoŭ, TUT.BY.

Trahiedyja adbyłasia dzieści na hetym učastku vulicy. Fota: Stanisłaŭ Šaršukoŭ, TUT.BY.

Jak raniej paviedamlała milicyja, dźvie kampanii adpačyvali ŭ bary na Zybickaj. U 46-hadovaha žychara Minska ŭźnik kanflikt z 28-hadovym haradziencam ź inšaj kampanii. Pryčynaj stała sproba adnaho z adpačyvalnikaŭ stancavać na stale. 46-hadovy minčanin zrabiŭ zaŭvahu, jakaja nie spadabałasia ludziam ź inšaj kampanii. Mužčyny vyjšli vyśviatlać adnosiny na vulicu, dzie minčanin atrymaŭ try ŭdary ŭ tvar i pamior da pryjezdu chutkaj. 28-hadovy žychar Hrodna adpuščany pad abaviazalnictva ab jaŭcy.

Viersija rabotnikaŭ bara častkova adroźnivajecca ad milicejskaj zvodki. Jany raspaviali, što pieršaj va ŭstanovu ŭ pačatku piataj hadziny pryjšła kampanija z čatyroch čałaviek. U joj i byŭ 28-hadovy chłopiec z Hrodna. Astatnim vizualna taksama było ŭ rajonie tryccaci. U niejki momant maładyja ludzi zaleźli na stoł i pačali tancavać. Heta chutka spyniŭ achoŭnik, ŭsie źleźli sa stała i paprasili prabačeńnia.

A 46-hadovy minčanin ź siabram prykładna takoha ž vieku pryjšli va ŭstanovu krychu paźniej. Dźvie kampanii chutka pačali mieć znosiny: razam pili ałkahol, płacili adrazu, pavodzili siabie adekvatna.

- Na vyhlad usie narmalnyja. Nie bydła, nie hopniki. Siadzieli, śmiajalisia, - ŭdakładniajuć va ŭstanovie.

Paśla abiedźvie kampanii vyjšli z ustanovy. Niejki čas ich nie było, a potym u bar zabiehła dziaŭčyna i paprasiła vyklikać chutkuju. 46-hadovy minčanin lažaŭ na ziamli, jaho siabar stajaŭ pobač, a čaćviora chłopcaŭ źbiehli. Jak adbyłasia bojka, nichto nie bačyŭ, tamu što hetaje miesca z bara nie prahladajecca. Miedykaŭ vyklikali adrazu ž - u 5.47.

- A ŭ 5.53 pieratelefanavali z AMAPu, ŭdakładnili adras i jašče praź piać chvilin byli na miescy. Potym chutkuju čakali, jon (paciarpieły. - zaŭvaha. TUT.BY) dychaŭ, chrypieŭ… Chutkaja jechała chvilin 15-20. Jany zatrymalisia ŭ šłahbaŭma i nie mahli ŭźjechać na Zybickuju. Moža, kali b jany paśpieli … - raspaviadajuć supracoŭniki ŭstanovy.

Potym supracoŭniki chutkaj vyklikali reanimacyjnuju bryhadu, jakaja taksama sprabavała vyratavać mužčynu. Reanimacyjnyja dziejańni pravodzili jašče kala 30 chvilin, ale minčanin pamior. Było ŭžo prykładna pałova na siomuju.

- Heta było tak strašna. Kali jaho adkačvali, siabar stajaŭ pobač na kaleniach i roŭ: «Ratujcie jaho, jon nie choča pamirać», - uspaminajuć rabotniki.

Ale ž časta kažuć, što na Zybickaj šmat milicyi. Jak heta ŭsio mahło adbycca?

Va ŭstanovie adkazvajuć, što zimoj u taki čas milicyja na Zybickaj byvaje redka, bo na vulicy ŭžo paprostu niama ludziej. A ŭletku - tak, patrulujuć i a šostaj ranicy.

Клас
0
Панылы сорам
0
Ха-ха
0
Ого
0
Сумна
0
Абуральна
0