U prajekcie novaj redakcyi Padatkovaha kodeksa, jaki deputaty Pałaty pradstaŭnikoŭ u kancy śniežnia ŭchvalili ŭ pieršym i druhim čytańniach, jość źmieny, jakija tyčacca tych, chto źbirajecca pradać ci ŭžo pradaŭ zakansiervavany žyły dom, piša Realt.by.

U apošnija hady padatkovaja stała ličyć niedabudavanyja damy (pa aficyjnych dakumientach «budynki niavyśvietlenaha pryznačeńnia») niežyłymi pabudovami. U vyniku ŭsie, chto mierkavaŭ, što raz na 5 hadoŭ maje prava realizoŭvać kvateru, daču ci katedž (chaj i zakansiervavany) biez vypłaty padatku, stali atrymlivać listy z patrabavańniem vypłacić padachodny padatak.

Za paru hadoŭ u hetuju «pastku» trapili niekalki sotniaŭ čałaviek z roznych abłaściej krainy. Chtości pahadziŭsia i vypłaciŭ naličanyja sumy, inšyja vyrašyli adstojvać svaju praŭdu na lhotu ŭ sudzie. Tak, siamji ź Viciebska naličyli 30 tysiač rubloŭ padatku za prodaž praktyčna hatovaha katedža ŭ centry horada. Pry hetym nivodzin arhumient, jaki dakazvaje, što heta žyły dom, z prodažu jakoha nie treba vypłačvać padatak, sud da ŭvahi nie pryniaŭ.

U 2019 hodzie padobnych prablem być nie pavinna. Jak paćvierdzili ŭ pres-centry Hałoŭnaha ŭpraŭleńnia raźvićcia padatkovych orhanaŭ Ministerstva pa padatkach i zborach Respubliki Biełaruś, adpaviednaja papraŭka jość u novym Padatkovym kodeksie: «U artykule «Dachody, jakija vyzvalajucca ad padachodnaha padatku ź fizičnych asob» praduhledžany pałažeńni ab vyzvaleńni ad padatkaabkładańnia dachodaŭ ad vypłatnaha adčužeńnia niezavieršanaha budaŭnictvam kapitalnaha budynka (budynka, zbudavańnia) niezaležna ad pryznačeńnia takoha budynka, ale pry hetym raźmieščanaha na ziamielnym učastku, pradastaŭlenym dla budaŭnictva i absłuhoŭvańnia žyłoha doma, sadavodstva, dačnaha budaŭnictva.

Akramia taho, u metach vyklučeńnia dyskryminacyi pravoŭ hramadzian pry padatkaabkładańni adnych i tych ža dachodaŭ tolki ŭ zaležnaści ad daty ich atrymańnia nazvanym zakonaprajektam praduhledžvajecca raspaŭsiudžvańnie lhoty pa vyzvaleńni dachodaŭ hramadzian, jakija atrymlivajucca ad vypłatnaha adčužeńnia niezavieršanych budaŭnictvam kapitalnych pabudoŭ, taksama i na adnosiny, jakija ŭźnikli da 1 studzienia 2019 hoda».

Apošni abzac hetaj papraŭki aznačaje, što źmieny zakranuć i tych, chto ździejśniŭ ździełki da ŭstupleńnia ŭ siłu novych praviłaŭ: ź ich pavinny być źniatyja abaviazalnictvy pa vypłacie padatku z dachodaŭ ad prodažu niezavieršanaha budaŭnictva. Novy padatkovy kodeks ustupiŭ u siłu 1 studzienia 2019 hoda.

Клас
0
Панылы сорам
0
Ха-ха
0
Ого
0
Сумна
0
Абуральна
0