Pračytaŭ siońnia ŭ «Vyborčaj» archicikavaje interviju ź ispanskim piśmieńnikam, jakoha nazyvajuć adnym z samych surjoznych kandydataŭ na Nobiela — Chavijeram Maryjasam. Były vykładčyk Oksfardu, jaki pierakłaŭ na ispanskuju Apdejka, Konrada, Nabokava, Styvensana, i ličycca adnym z samych krutych intelektuałaŭ u Ispanii. I tam takaja biaźlitasnaja acenka našych časoŭ, jakaja nie adpuskaje mianie paŭdnia.

«Sučasny čałaviek havoryć bieź pierapynku i biez zabyćcia. Kožnaje słova jamu zdajecca važnym, i niama značeńnia, skazaŭ jon heta ŭ kaviarni, pa telefonie, u internecie. Jamu zdajecca, što kožnaje jahonaje słova adrazu ž robicca abaviazkovym mierkavańniem, ź jakim pavinien ličycca ŭvieś śviet. My dažyli da časoŭ, kali ŭsie arhumientujuć, dyskutujuć, adčuvajuć siabie biespakarana ŭ svaim nievuctvie. Ci ździŭlaje kahości, kali siońnia niechta kaža: «Sonca ŭzychodzić na ŭschodzie», a druhi čałaviek biez soramu adkazvaje: «Nu, što ž, heta tvajo mierkavańnie». Mnie ŭžo nia śmiešna.

Siońnia ludzi narcystyčnyja, jak nikoli. Ludzi stali z usiaho ździekavacca i naśmichacca, jany dumajuć, što ŭsio mohuć skazać, kožnaha abplavać, insinuavać, abvinavačvać inšych biez faktaŭ, hruntujučysia na domysłach, hipotezach, złości. Jany heta robiać, bo nie niasuć nijakaha pakarańnia. Ahida zamianiła prystojnaść.

Hady tamu ja razmaŭlaŭ pra heta z Umberta Eka, pra rolu, jakuju pačali adyhryvać u našym žyćci ŚMI, najpierš Internet. Ja skazaŭ jamu, što na našych vačach adbyvajecca sapraŭdny pieravarot. U zachodniaj cyvilizacyi, jakuju my taksama nazyvajem chryścijanskaj, šmat stahodździaŭ ludzi byli pierakanany, što za imi bieśpierapynna niechta sočyć, niechta aceńvaje ich žyćcio.

— Boh? — pytajecca žurnalist.

— Boh. Śviedka i sudździa adnačasova. Heta z adnaho boku strašna, a ź inšaha kamfortna. Isnavała sistema pravoŭ, zahadaŭ, zapaviedziaŭ, ludzi mieli ŭražańnie, što toje, što i jak jany robiać, maje značeńnie. A siońnia? Usio bolš ludziej nia vieryć u Boha, adkidaje relihiju. Ale heta nia značyć, što im nie patrebnyja śviedki, što jany nia chočuć, kab za imi nazirali i aceńvali. Hety niedachop zapoŭnili miedyi. Internet zamianiŭ Boha-sudździu. Mienavita tamu ludzi pakazvajuć navat najmienš važnyja fakty sa svajho žyćcia ŭ siecivie, zapaŭniać Internet zdymkami i spoviedziami. Im patrebnaja acenka.

— A što vam na heta skazaŭ Eka?

— Jon pahadziŭsia.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?