Uładzisłaŭ Inaziemcaŭ.
Inaziemcaŭ u svaim materyjale krytykuje dumku, što nastupnymi achviarami rasijskaj ahresii mohuć stać Łatvija abo Estonija. Dumka pra hetyja krainy prosta vynikaje z vobrazaŭ Kryma i Danbasa. Pra ich, i pra Ukrainu, kažuć zaŭsiody i ŭsie, kali pačynajuć abmiarkoŭvać Rasiju. Ale hadoŭ vosiem tamu z takoj ža zaciataściu ŭsie havaryli pra Abchaziju, Paŭdniovuju Asieciju i Hruziju, što ich straciła. Pamiž hetymi kiejsami, miarkuje Inaziemcaŭ, jość istotnaja roźnica.
U pieršym vypadku Rasija zaviaršyła adarvańnie ad susiedniaj krainy dźviuch terytoryj, jakija abviaścili siabie niezaležnymi, byli pryznanyja Maskvoj i pieratvarylisia ŭ klijenckija dziaržavy. Nastupnym razam Rasija ŭvarvałasia ŭ rehijon, dzie da hetaha nie było prykmiet hramadzianskaj vajny, ustanaviła tam kantrol, a paśla nielehitymnaha refierendumu aficyjna ŭklučyła jaho ŭ svoj skład. Pry hetym paciarpiełyja krainy (u adroźnieńnie ad Łatvii i Estonii) nie byli siabrami NATA ci ES.
A ciapier dla taho, kab padahreć patryjatyčny čad unutry Rasii, joj daviadziecca akupavać cełuju krainu — mierkavanuju častku tak zvanaha «Ruskaha śvietu», jakaja pakul što nie ŭvachodzić u zachodnija aljansy. I kandydat tut, miarkuje Inaziemcaŭ, tolki adzin — Biełaruś.
Ekanamist ličyć, što padstaŭ dla anšlusu našaj krainy šmat. Pa-pieršaje, dla hetaha isnuje pravavaja asnova ŭ vyhladzie tak zvanaj «sajuznaj dziaržavy», jakuju možna zrabić jašče bolš sajuznaj. Pa-druhoje, Rasija moža ličyć, što maje na taki krok «maralnyja padstavy», bo štohod tracić na biełaruskuju ekanomiku pa $ 7-8 miljardaŭ. Pa-treciaje, Kramlu nie padabajecca svavolnaja źniešniaja palityka Łukašenki. Pa-čaćviortaje, u Kramli razumiejuć, što nichto na Zachadzie nie zastupicca za «apošniaha dyktatara Jeŭropy». Pa-piataje, z dapamohaj anšlusu Biełarusi možna vyrašyć «prablemu 2024 hoda» ŭ Rasii, kali ŭ Pucina budzie zakančvacca čarhovy prezidencki termin. Takoje raźvićcio padziej dazvolić Pucinu stać kiraŭnikom novaj dziaržavy i atrymać patryjatyčny ŭzdym unutry Rasii, jaki byŭ by macniejšym za krymski.
Publicyst ličyć, što jość usie padstavy čakać rezkaj eskałacyi vakoł Biełarusi ŭžo ŭ nastupnym hodzie.