13 kastryčnika a 16-j u Minsk prylacieŭ patryjarch Maskoŭski Kirył.
Kiraŭnik Ruskaj pravasłaŭnaj carkvy maje ŭziać udzieł u pasiadžeńni Sinodu RPC, jakoje projdzie 15 kastryčnika ŭ stalicy Biełarusi.
U aeraporcie Kiryła sustrakali staršynia Kamiteta pa spravach relihijaŭ i nacyjanalnaściaŭ Leanid Hulaka, pasoł Rasii ŭ Biełarusi Michaił Babič, mitrapalit Minski i Zasłaŭski Pavieł.
U karotkim słovie pa prylocie patryjarch błasłaviŭ biełaruskuju ziamlu i adznačyŭ, što padčas Sinodu nieabchodna budzie adreahavać na situacyju va Ukrainie.
«Spadziajusia, što pravasłaŭnaja carkva znojdzie ŭ sabie siły pieraadoleć tyja kryzisnyja źjavy, jakija isnujuć, zachavać svajo adzinstva», — adznačyŭ jon.
U subotu ŭviečary patryjarch Kirył uznačalić bohasłužeńnie ŭ Śviata-Duchavym kafiedralnym sabory Minska a 18-j.
«Adkaz Sinoda Ruskaj pravasłaŭnaj carkvy pa rašeńniach Kanstancinopalskaha patryjarchatu adnosna Ukrainy budzie adekvatnym i žorstkim».
Pra heta skazaŭ u subotu žurnalistam pres-sakratar patryjarcha Maskoŭskaha i ŭsiaje Rusi Kiryła śviatar Alaksandr Vołkaŭ z nahody vizitu kiraŭnika RPC u Biełaruś, paviedamlaje tass.ru.
Razam z tym Vołkaŭ nie zmoh skazać, jakija kankretnyja rašeńni buduć pryniatyja.
«Sinod vykaža niedvuchsensoŭnuju pazicyju adnosna tych rašeńniaŭ, jakija byli pryniatyja ŭ Stambule», — skazaŭ jon.
Pres-sakratar patryjarcha Maskoŭskaha i ŭsiaje Rusi dadaŭ, što Ukrainskaja pravasłaŭnaja carkva źjaŭlajecca adzinaj kananična pryznanaj i praciahnie svajo słužeńnie.
Na pasiadžeńni Sinoda 9—11 kastryčnika Kanstancinopalski patryjarchat «paćvierdziŭ rašeńnie ab tym, što pačynaje pradastaŭleńnie aŭtakiefalii Carkvie Ukrainy i admianiaje rašeńnie 1686 hoda ab pierachodzie Kijeŭskaj mitrapolii pad jurysdykcyju Maskoŭskaha patryjarchatu».
Taksama było pryniata rašeńnie źniać anafiemu z kiraŭnikoŭ dźviuch niekananičnych cerkvaŭ na Ukrainie — Fiłareta z Kijeŭskaha patryjarchatu i Makaryja z Ukrainskaj aŭtakiefalnaj carkvy. Było abvieščana ab žadańni viarnuć Kijeŭskuju mitrapoliju pad jurysdykcyju Suśvietnaha patryjarchatu.
