Načalniku padatkovaj inśpiekcyi Savieckaha rajona Homiela prysudzili 5 z pałovaj hadoŭ pazbaŭleńnia voli z kanfiskacyjaj majomaści, piša Radyjo Svaboda.
12 kastryčnika sud Čyhunačnaha rajonu Homiela vynies rašeńnie pa kryminalnaj spravie načalnika padatkovaj inspekcyi Savieckaha rajonu horadu.
Fota z sajta TUT.BY
Kanstancin Traceŭski pakarany pazbaŭleńniem voli na 5 z pałovaj hadoŭ z kanfiskacyjaj majomaści. Chabaram śledztva pryznała vazu i karcinu ahulnym koštam 155 rubloŭ. Sam Traceŭski vinavatym siabie nie pryznaŭ.
42-hadovy Kanstancin Traceŭski byŭ zatrymany ŭ lutym 2018 hodu. Śledztva pryjšło da vysnovy, što na vusnyja zahady kiraŭnika padatkovaj jahonyja padnačalenyja nie pravodzili pravierki ci spyniali ich, a vinavatyja paźbiahali adkaznaści.
Śledčy kamitet paśla zatrymańnia paviedamiŭ: pry pieratrusie doma ŭ zatrymanaha znajšli darahija hadzińniki i asadki, kalekcyjnyja manety, «alkaholnyja napoi viadomych vytvorcaŭ», aŭtamabil Audi Q7.
Na sudzie vyśvietliłasia, što ŭsie hetyja rečy nia majuć dačynieńnia da kryminalnaj spravy. Chabaram śledztva paličyła vazu i karcinu, atrymanyja Traceŭskim ad znajomaj pradprymalnicy. Abvinavačańnie ličyć, što «pradmietami interjeru» ŭłaśnica handlovaha punktu adździačyła načalniku padatkovaj za spynieńnie pravierki.
Abvinavačany patłumačyŭ, što dziakavać jamu nie było za što — parušeńniaŭ padčas pravierki ŭ kramie nie vyjavili. Padnačalenym jon sapraŭdy telefanavaŭ nakont hetaj pravierki, kab paprasić: «Nie pałochajcie čałavieka».
Traceŭskamu inkryminavałasia, što jon dapamoh svajmu pryjacielu-pradprymalniku paźbiehnuć adkaznaści. Pavodle versii abvinavačańnia, na ŭłaśnika piceryi pastupiła skarha ŭ padatkovuju, a kiraŭnik daŭ zahad svaim padnačalenym pravieści pravierku farmalna.
Na sudzie abvinavačany davodziŭ, što jon nie davaŭ padnačalenym złačynnych zahadaŭ. Z ułaśnikam piceryi jon nia pryjaciel. Traceŭski vykazaŭsia na sudzie, što jaho da zatrymańnia prasłuchoŭvali dva hady z pryčyny ananimnaha zvarotu, matyŭ jakoha — «pomsta i zajzdraść».