U atmaśfiernym ekśpiedycyjnym roliku možna pabačyć krajavidy i žycharoŭ viosak Zavierša, Horycy, Navasiołki, Bieździež u Drahičynskim rajonie i Čuchava, Botava, Stašany, Lemiaševičy na Pinščynie.
Tut piejzažy dy interjery, zakinutyja dy pakul žyłyja chaty, žyvioły, raśliny, aŭtałaŭka, prydarožnyja kryžy, śviežapafarbavanyja cerkvy, staryja rečy, što ŭžo vyjšli z užytku, i tyja, što pakul vykarystoŭvajucca…
Videaencykłapiedyja paleskaha žyćcia, jakoje pastupova adychodzić u niabyt, źnikaje, jak toj busieł, što zryvajecca ź miesca ŭ apošnim kadry rolika.
Materyjały, što ŭvajšli ŭ rolik, zdymalisia z 2015 hoda. Ludzi, jak viadoma, nie maładziejuć, mahčyma, niekatorych z hierojaŭ užo niama ŭ hetym śviecie.
Tłumačačy luboŭ da paŭdniovaj Biełarusi, lidar Vuraj Siaržuk Doŭhušaŭ kaža: «Z Paleśsia ŭsio pačynałasia. Kaniečnie, ja byvaŭ u ekśpiedycyjach nie tolki tam, ale pieršaja pajezdka — samaja zapaminalnaja. My vandravali razam z fatohrafam Michaiłam Leščankam i daśledčycaj Irynaj Maziuk pa Drahičynskim rajonie, u 2012 hodzie. A dalej ja pačaŭ samastojna arhanizoŭvać padarožžy, u niekatorych byli sa mnoj i muzyki hurta Vuraj. Nas navat mnohija nazyvajuć papularyzatarami paleskich piesień i havorak. Naprykład, naša nazva «Vuraj», a nie «Vyraj». Tak kažuć u asobnych rehijonach zachodniaha Paleśsia. A słovam «lito» na Paleśsi zavuć cykł abradavych piesień, što vykonvajucca paśla Kupalla».
Muzyki hurta Vuraj apošnija čatyry hady zapisvali pieśni ad starejšych žycharoŭ zhublenych u bahnach i lasach paleskich viosak. Albom Lito staŭ svojeasablivym padsumavańniem hetaj pracy. U jaho składzie — pieraasensavany aŭtentyčny materyjał. Kožnaj pieśni nadadziena admietnaje «vurajskaje» hučańnie. Siaržuk Doŭhušaŭ tłumačyć: «My pasprabavali maksimalna zachavać usiu mahiju i sakralny sens piesień, a hałoŭnaje — miełodyi i mikramovy. My, jak kampazitary, pačuli niešta kaśmičnaje, natchnilisia i pačali pisać svaju simfoniju. Na albomie Lito hučać pieśni, znojdzienyja ŭ roznych kutkach Paleśsia. Dla tvorčych ekśpierymientaŭ my ŭziali tolki małuju častku zapisanaha materyjału. U albom uvajšło i niekalki instrumientalnych tvoraŭ. Upieršyniu ŭ našych kampazicyjach zahučała kołavaja lira i źjavilisia aŭtentyčnyja vykanaŭcy».
Akramia ŭłasna piesień vialikuju rolu adyhrali ŭražańni, atrymanyja padčas ekśpiedycyj. Imi muzyki i pasprabavali padzialicca ŭ videaroliku.
Hrošy na albom Lito źbirali praz kraŭdfandynh. Zapis, źviadzieńnie i masterynh rabili ŭ Varšavie. 1 listapada adbudziecca kancertnaja prezientacyja dyska ŭ prastory OK16.
