Viktar Ałkśnis. Fota: Wikimedia Commons.
Były deputat rasijskaj Dziarždumy Viktar Ałkśnis u intervju vydańniu «Svobodnaja priessa» praanalizavaŭ vykazvańnie Alaksandra Łukašenki pra hatoŭnaść razdać siem miljonaŭ adzinak zbroi na vypadak vajennaha kanfliktu, a taksama ciapierašni stan biełaruska-rasijskich adnosin.
Na dumku palityka, abiedźvie krainy vinavatyja ŭ paharšeńni adnosin, ale vina Rasii — bolšaja.
Adnoj z prablem było toje, što ŭ Pucina i Łukašenki nie skłalisia asabistyja adnosiny:
«Kali ja byŭ u pieršaj pałovie 2000-ch deputatam Dziarždumy, mahu śćviardžać: prosta adčuvałasia, što Pucin vielmi nie lubić Łukašenku. Adpaviedna, biełaruski lidar pačaŭ rabić toje samaje».
Były deputat pryznaje, što Sajuznaja dziaržava faktyčna pierastała isnavać.
Krytykuje Ałkśnis i byłoha pasła Rasii Surykava, jaki, na jaho dumku, «zajmaŭsia nieviadoma čym».
I pakolki z kožnym hodam asabistyja adnosiny Pucina i Łukašenki tolki horšali, biełaruski lidar pačaŭ uśviedamlać, što źjaŭlajecca lišnim. I adpaviedna pačaŭ pastupova pravodzić palityku, nakiravanuju na sychod sa śfiery ŭpłyvu Rasii, ličyć były deputat Dziarždumy:
«Jašče 10 hadoŭ tamu Łukašenka moh raźličvać na padtrymku Rasii — palityčnuju, ekanamičnuju, na mižnarodnaj arenie. Ale pa miery paharšeńnia adnosin hetaja padtrymka skaračałasia. A ciapier Maskva vyrašyła i zusim śpisać Łukašenku — znajści jamu zamienu».
Łukašenka vydatna razumieje, što zastaŭsia adzin, ličyć Ałkśnis. I što jon moža raźličvać tolki na padtrymku ŭnutry Biełarusi.
Palityk źviartaje ŭvahu na toje, što Biełaruś u hady vajny była partyzanskim krajem, i biełarusy vielmi ŭmieła vajavali suprać viermachta:
«Tak što ciapierašniaje pasłańnie Łukašenki, biez sumnievu, namiakaje pra tyja časy, i adrasavana mienavita Rasii, a nie Zachadu».
Takija vybryki ŭ bok Rasii śviedčać ab tym, što Łukašenka zahnany ŭ kut, ličyć były deputat.
Na jaho dumku, pryznačeńnie pasłom Michaiła Babiča śviedčyć, što Maskva rychtujecca kali nie da siłavoha varyjantu rašeńnia biełaruskaj prablemy, to da varyjantu zakručvańnia hajek.
