Na vychodnych u padmaskoŭnym pansijanacie ekśpierty ź Biełarusi i Rasii šukali adkaz na pytańnie: što čakaje Sajuznuju dziaržavu? Dyskusija była arhanizavanaja rasijskim Centram vyvučeńnia pierśpiektyŭ intehracyi. Biełaruś, pa słovach kiraŭnika kansiervatyŭnaha centra Nomos Piatra Piatroŭskaha, pradstaŭlali «ekśpierty z roznych analityčnych i akademičnych struktur», paviedamlaje Jeŭraradyjo.
«Prapracoŭvałasia niekalki scenaryjaŭ. Ad taho, što farmat Sajuznaj dziaržavy budzie pašyrany na Jeŭrazijski sajuz, jon vyjdzie za miežy ekanamičnaha sajuza. Pra heta ŭžo šmat chto kaža, bo pryncyp pieramiaščeńnia pracoŭnaj siły patrabuje, jak minimum, jašče i prapracoŭki sacyjalnych paramietraŭ raźvićcia krain. Hetak ža i niehatyŭnyja scenaryi razhladalisia: spynieńnie isnavańnia i razvał Sajuznaj dziaržavy. Kožny z raspracavanych scenaryjaŭ praduhledžvaje faktary, jakija mohuć na jaho paŭpłyvać. A taksama ŭtrymlivaje miechanizmy, jakija pavinny dapuścić ci nie dapuścić hetyja faktary», — kaža Piotr Piatroŭski.
Na pytańnie, ci razhladaŭsia scenaryj, kali Biełaruś stračvaje svaju niezaležnaść i ŭvachodzić u skład Rasii, Piatroŭski dakładnaha adkazu nie daje. Maŭlaŭ, heta moža być składnikam «bolš šyrokaha scenaryja, jaki maje dačynieńnie da Sajuznaj dziaržavy».
Cikava, što ni imiony ekśpiertaŭ, ni nazvach hetych struktur, što brali ŭdzieł u sustrečy, nie publikujucca. Ale heta nie tamu, što jany saromiejucca svaich dumak. Pa słovach Piatroŭskaha, pakul nieviadoma, chto z udzielnikaŭ dyskusii ŭ padmaskoŭnym pansijanacie zachoča zastacca ananimnym, kali jaje vyniki buduć vykładzienyja ŭ asobnaj brašury.
Zbornik płanujuć dasłać i ŭ administracyi kiraŭnikoŭ Rasii i Biełarusi, i ŭ Pastajanny kamitet Sajuznaj dziaržavy, i ŭ profilnyja ministerstvy abiedźviuch krain. Ci budzie jaho chto-niebudź čytać? Adkazu va ŭdzielnikaŭ dyskusii niama.
«Z adnaho boku, toj ža Pastajanny kamitet, Jeŭrazijskaja kamisija, profilnyja ministerstvy vykazvajuć nam publična i niefarmalna, što jany zacikaŭlenyja ŭ ekśpiertnych materyjałach. Ale my nie možam prasačyć, ci buduć vykarystanyja našy materyjały ŭ pryniaćci niejkich rašeńniaŭ, ci składuć jany asnovu niekatorych rašeńniaŭ. My prosta na hety kont niekampietentnyja», — pryznajecca Piatroŭski.
Tym nie mienš, užo viadoma, što mierapryjemstvy na temu «budučyni rasijska-biełaruskich adnosin i analizu raźvićcia Sajuznaj dziaržavy» rasijski Centr vyvučeńnia pierśpiektyŭ intehracyi budzie pravodzić i dalej.
