Prezident Rasii Uładzimir Pucin zastajecca rasijskim palitykam, jakomu nasielnictva daviaraje bolej, čym astatnim. Adnak jaho rejtynh padaje, adznačajuć sacyjołahi z «Lavada-centra».
U listapadzie 2017 hoda Pucinu daviarali 59% udzielnikaŭ apytańnia. U červieni 2018 hoda — užo 48%. Siońnia — tolki 39%.
Davier rasijan taksama padaje da ministra abarony Rasii Siarhieju Šajhu. 15% zaraz suprać 19% u červieni 2018 hoda i 23% hod tamu. Hublaje i kiraŭnik MZS Siarhiej Łaŭroŭ. Siońnia jon zasłuhoŭvaje davieru tolki ŭ kožnaha dziasiataha rasijanina (10%). Jašče letam hety pakazčyk byŭ 14%. U listapadzie 2017 hodu — 19%.
Palepšyŭ svaje pazicyi apazicyjanier Alaksiej Navalny. Kali hod tamu i minułym letam jamu daviaraŭ tolki kožny piacidziesiaty (2%), to ciapier užo 3% rasijan vierać apazicyjanieru. Kožny piaty ŭdzielnik apytańnia zajaviŭ, što palitykaŭ, jakija zasłuhoŭvajuć jaho davier, niama zusim.
Razam z tym biezumoŭnym lidaram antyrejtynhu davieru zastajecca Dźmitryj Miadźviedzieŭ. Siońnia jamu «bolš za ŭsio nie daviaraje» 31% rasijan. Hod tamu takich było 19%. Śledam idzie Uładzimir Žyrynoŭski, kolkaść praciŭnikaŭ jakoha za hod vyrasła z 18% da 20%. Treciaje miesca zajmaje Uładzimir Pucin, jaki pavialičyŭ kolkaść tych, chto jamu nie daviaraje, za minuły hod udvaja. 13% siońnia suprać 7% u listapadzie 2017 hoda. Antyrejtynh čaćviortaha ŭ hetym śpisie — lidara kamunistaŭ Hienadzia Ziuhanava za hod nie źmianiŭsia — 11%.
Pry hetym nastupnyja za lidaram kamunistaŭ apazicyjaniery Ryhor Jaŭlinski, Ksienija Sabčak i Alaksiej Navalny za hod skaracili kolkaść svaich supiernikaŭ. Lidar «Jabłyka» ŭ try razy, z 11% hod tamu da 4% siońnia. Ksienija Sabčak — bolš čym u try razy, z 14% da 4%. I Alaksiej Navalny taksama utraja. U listapadzie 2017 Navalnamu nie daviaraŭ kožny dziasiaty respandent, a siońnia tolki 3%.
Raniej «Lavada-centr» paviedamlaŭ, što davier da prezidenta Rasii viarnuŭsia na ŭzrovień, jaki sacyjołahi fiksavali da anieksii Kryma.
