36-hadovy žychar vioski Žodziški Smarhonskaha rajona sapsavaŭ amal uvieś harderob svajoj žonki, abliŭšy 36 pradmietaŭ jaje adzieńnia elektralitam, paviedamlaje Kraj.by. SK raspačaŭ kryminalnuju spravu.
Žonka padała na razvod. Mužu heta nie spadabałasia. Siamiejnaj pary pry razvodzie pryjdziecca dzialić majomaść. Da taho ž mužčyna padazraje žonku ŭ niaviernaści. Usio heta i stała matyvam złačynstva. Pa słovach žančyny, reŭnaść muža ŭ apošni čas stała manijakalnaj. Siarod sapsavanaha adzieńnia jość darahija rečy — palito, kurtka, kažušok, dublonka.
Elektralit mužčyna šprycom nabiraŭ u akumulatary svajoj mašyny. Jon raŭnavaŭ žonku, i z reŭnaści abliŭ hetaj vadkaściu jaje adzieńnie.
Złačynstva było ździejśniena ŭ pieryjad z 14 žniŭnia pa 15 vieraśnia. Mienavita ŭ siaredzinie vieraśnia ślady, pakinutyja elektralitam na vopratcy, stali bačnymi. Heta rečyva nie maje pachu i prajadaje adzieńnie tolki praź niekatory čas. Na im źjaŭlajucca dzirki, rečy stanoviacca jak papiarovyja, i ŭ vyniku pačynajuć litaralna rassypacca.
Adramantavać adzieńnie niemahčyma. Suma naniesienaj straty — bolš za tysiaču rubloŭ.
U muža i žonki jość niepaŭnaletnija dzieci, zaraz jany razvodziacca.
Mužčyna raniej niesudzimy. Byŭ indyvidualnym pradprymalnikam, ale apošnim časam nie pracuje.
Sprava raspačataja za naŭmysnaje źniščeńnie abo paškodžańnie majomaści, jakoje paciahnuła pryčynieńnie straty ŭ značnym pamiery. Mužčynu pahražaje da 2 hadoŭ abmiežavańnia voli.
