Interpoł nakiravaŭ uładam Kitaja aficyjny zapyt z prośbaj dać infarmacyju ab statusie prezidenta arhanizacyi Mena Chunveja, paviedamlajecca na staroncy Interpoła ŭ Twitter.
«Interpoł praz aficyjnyja kanały pravaachoŭnych orhanaŭ nakiravaŭ zapyt ŭładam Kitaja, kab atrymać tłumačeńni ab statusie prezidenta Interpoła Mena Chunveja», — zajaviŭ hienieralny sakratar arhanizacyi Jurhien Stok, čyje słovy pryvodziacca ŭ zajavie.
Jon padkreśliŭ, što hienieralny sakrataryjat čakaje ad Piekina adkazu i niepakoicca ab stanie prezidenta Interpoła.
Kiraŭnik Interpoła ŭ kancy vieraśnia adpraviŭsia ŭ Kitaj, kab pravieści tam adpačynak, ale nie viarnuŭsia. Jaho žonka padała ŭ palicyju Francyi zajavu ab jaho źniknieńni.
Jak piša RBK sa spasyłkaj na hazietu South China Morning Post, kitajskija pravaachoŭniki zatrymali kiraŭnika Interpoła adrazu paśla taho, jak jaho samalot pryziamliŭsia ŭ Kitai. Hazieta adznačaje, što pra pryčyny zatrymańnia Chunveja nieviadoma.
Chunveja abrali prezidentam Interpoła ŭ listapadzie 2016 hoda. Jon taksama źjaŭlajecca namieśnikam ministra hramadskaj biaśpieki KNR. U roznyja hady jon pracavaŭ dyrektaram adździeła patrulnaj palicyi, kiraŭnikom departamienta kiravańnia darožnym rucham, namieśnikam staršyni Nacyjanalnaj kamisii pa kantroli nad narkotykami, kiraŭnikom Nacyjanalnaha kontrterarystyčnaha kiravańnia i hienieralnym dyrektaram bierahavoj achovy Kitaja.
