Što takoje Tax Free i čamu jość mahčymaść viarnuć hrošy
Kožny tavar u kramie abkładajecca padatkam na dadatkovuju vartaść (PDV, VAT), jaki płaciać hramadzianie krainy i jaje padatkovyja rezidenty. Pakolki turysty i zamiežnyja hości ŭ hetyja katehoryi nie ŭvachodziać, to i padatak na dadatkovuju vartaść jany płacić nie abaviazanyja.
Mienavita dla taho, kab zamiežnik mieŭ mahčymaść viarnuć apłačany pry nabyćci tavaru padatak, była ŭviedziena sistema viartańnia zamiežnym hramadzianam padatku na dadatkovuju vartaść (PDV, VAT) — sistema Tax Free. U pierakładzie z anhielskaj hetaje słovazłučeńnie akurat i pierakładajecca «biez zboraŭ».
Chto zajmajecca viartańniem padatkovych płaciažoŭ
Isnujuć dva asnoŭnyja sposaby viartańnia padatkovych płaciažoŭ.
Pieršy — praz pasrednictva mižnarodnych kampanij, takich jak Global Blue, Tax Free Worldwide, Premier Tax Free, Tax Card, Litofolija Tax Free (apošnija dźvie dziejničajuć na terytoryi Litvy).
Druhi — praz nacyjanalnuju sistemu viartańnia Tax Free toj krainy, dzie była ździejśniena pakupka. U pryvatnaści, takija sistemy dziejničajuć na terytoryi Litvy i Polščy.
U pieršym vypadku sumu padatku viartaje kampanija, ź jakoj supracoŭničaje krama. Hety sposab maje bolšuju kolkaść varyjantaŭ viartańnia hrošaj i padydzie tym, chto nie płanuje albo nie maje mahčymaści viarnucca ŭ krainu, dzie byŭ nabyty tavar. Ź vidavočnych minusaŭ — pasrednik zabiare sabie častku hrošaj.
U druhim vypadku padatak viartajecca ŭ toj kramie (albo adnoj z kram handlovaj sietki), u jakoj była ździejśniena pakupka. Kamisijnyja zbory nie spahaniajucca, adpaviedna viartajecca 100% padatku. Asnoŭny minus — abaviazkova treba viarnucca ŭ krainu, dzie była ździejśniena pakupka.
Da ŭvahi: niekatoryja polskija i litoŭskija kramy mohuć pracavać pa abiedźviuch sistemach zvarotu Tax Free, što dazvalaje pakupniku vybrać bolš zručny dla jaho sposab viartańnia hrošaj.
Pra toje, što handlovy abjekt pracuje ŭ sistemie viartańnia Tax Free, śviedčać admysłovyja łahatypy, jakija zvyčajna znachodziacca na dźviarach, vitrynach, kala kasy.
Ad čaho zaležyć suma viartańnia
Suma viartańnia zaležyć ad staŭki PDV toj krainy, u jakoj była zroblena pakupka. Pry hetym na roznyja katehoryi praduktaŭ staŭki PDV mohuć być roznymi. U Polščy, naprykład, asnoŭnaja staŭka PDV składaje 23% (bytavaja technika, vopratka, abutak i inš), PDV na dziciačyja tavary, bytavuju chimiju — 8%, na charčovyja pradukty, knihi i sacyjalnuju pradukcyju — 5%. U Litvie asnoŭnaja staŭka PDV — 21%, u Hiermanii — 19%, u Francyi — 20%, u Čechii — 21%.
Aktualnuju infarmacyju pra staŭki PDV pa kankretnych krainach možna praviarać na aficyjnych sajtach kampanij Premier Tax Free i Global Blue. Na sajcie apošniaj jość prahrama-kalkulatar, jakaja dazvalaje rabić papiarednija raźliki sumy vypłat pa čekach Tax Free.
Nie zabyvajciesia, što sumu viartańnia treba ličyć nie ad koštu ŭsioj pakupki, a ad koštu pakupki za vyniatkam PDV. Inšymi słovami,
kali televizar kaštuje 1000 dalaraŭ, u Polščy atrymajecca viarnuć maksimum 177 dalaraŭ (ad 1000 dalaraŭ adnimajem 230 dalaraŭ PDV, i vyličvajem 23% ad atrymanaha liku). U realnaści heta kala 17-18% ad poŭnaha koštu. A kali afarmlać dakumienty praz Global Blue, atrymajecca viarnuć 12-13%.
Asnoŭny pryncyp viartańnia hrošaj
Kab viarnuć hrošy, treba prasačyć za pravilnym afarmleńniem dakumientaŭ na pakupku i praštampavać na miažy čeki Tax Free.
Za jakija tavary viartajecca Tax Free
Pieralik tavaraŭ adroźnivajecca ŭ zaležnaści ad krainy. U pieravažnaj bolšaści vypadkaŭ niemahčyma viarnuć Tax Free za ałkahol i cyharety, knihi, paliva, zapčastki dla aŭtamabilaŭ, kaštoŭnyja kamiani i juvielirnyja vyraby, a taksama pasłuhi. Nie viartajecca Tax Free i za pakupki, zroblenyja praź internet.
Da ŭvahi: u Litvie i Polščy možna aformić Tax Free na charčovyja pradukty i leki, a voś u Hiermanii — jašče i na knihi.
Što nieabchodna zrabić, kab mieć mahčymaść viarnuć hrošy
Praviły viartańnia Tax Free u kožnaj krainie roznyja, a tamu pierad pajezdkaj za miažu varta ŭdakładniać niuansy pa kožnaj krainie asobna. Asnoŭny ž ałharytm dziejańniaŭ nastupny:
1. U kramie, dzie dziejničaje sistema Tax Free, nabyć tavar i zapłacić za jaho adpaviednuju sumu.
Heta značyć, što Tax Free viartajecca nie z kožnaj pakupki, ździejśnienaj za miažoj, a tolki pry nabyćci peŭnych vidaŭ tavaraŭ i na peŭnuju minimalnuju sumu. Pry hetym minimalnaja suma pavinna być prabita ŭ adnym čeku i dla kožnaj krainy hetaja suma roznaja.
Da ŭvahi: u litoŭskich kramach možna viarnuć Tax Free pa sukupnaści čekaŭ za tavary, nabytyja ŭ adzin dzień u adnaho pradaŭca.
Karysnaja infarmacyja: minimalnaja suma pakupki dla afarmleńnia čekaŭ Tax Free ŭ Polščy — 200 polskich złotych, u Litvie — 55 jeŭra, u Hiermanii — 25 jeŭra (30 jeŭra na knihi), u Francyi — 175,01 jeŭra, u Čechii — 2001 češskaja krona. Aktualnuju infarmacyju pra staŭki PDV pa krainach možna praviarać na aficyjnych sajtach kampanij Global Blue i Premier Tax Free.
2. Paśla taho, jak tavar budzie apłačany i na rukach budzie ček, paprasić u pradaŭca zapoŭnić śpiecyjalnuju formu (ček, błank) na atrymańnie Tax Free.
Važna: 1) dla taho, kab aformić ček Tax Free, nieabchodny pašpart!
2) ček na viartańnie Tax Free pavinien być aformleny ŭ dzień pakupki tavaru. Adpaviedna na čeku Tax Free i čeku na pakupki pavinna stajać adnolkavaja data. Aformić ček Tax Free ŭ inšy dzień paśla pakupki nielha. Niesupadzieńnie dat na čekach — pryčyna dla admovy ŭ viartańni Tax Free.
3) ček Tax Free dziejničaje tolki pry najaŭnaści čeka na pakupku. Biez čeka na pakupku forma Tax Free źjaŭlajecca niesapraŭdnaj.
Zapoŭnienaja forma Tax Free pavinna być biez vypraŭleńniaŭ. Kali zapoŭnieny błank maje vypraŭleńni, lepš nie pasaromiecca i paprasić pradaŭca zapoŭnić novy.
3. Na mytni pry vyjeździe z krainy pastavić mytnuju piačatku na čeku Tax Free.
Krainy Jeŭrasajuza źjaŭlajucca adnoj ekanamičnaj zonaj, tamu stavić mytnuju piačatku treba ŭ toj krainie ES, praź jakuju vy vyjazdžajecie.
Dla taho, kab atrymać piačatku, nieabchodna pakazać mytniku nabyty tavar, ček na pakupku, ček Tax Free i pašpart.
Važna: 1) usie tavary, paznačanyja ŭ čeku Tax Free, pavinny być u najaŭnaści. U advarotnym vypadku jość vierahodnaść atrymać štraf, jaki daviadziecca zapłacić tut ža na mytni.
2) tavar pavinien być nieŭžyvanym, mieć niepaškodžanuju spažyvieckuju ŭpakoŭku, zachavanyja birki i etykietki. Heta ŭ tym liku tyčycca vyvazu charčovych praduktaŭ, łasavacca jakimi da prachodžańnia miažy nie rekamiendujecca.
3) isnujuć dakładna vyznačanyja terminy, u jakija nieabchodna vyvieźci tavar z krainy i pastavić mytnuju piačatku. U pryvatnaści, tavary, nabytyja na terytoryi ES, nieabchodna vyvieźci nie paźniej za apošni dzień treciaha miesiaca paśla miesiaca, u jaki była ździejśniena pakupka. Heta značyć, što kali vy nabyli tavar u sakaviku, to pastavić mytnuju piačatku na čeki Tax Free nieabchodna da 30 červienia.
Da ŭvahi: kali vy pakidajecie terytoryju Jeŭraźviaza praz Polšču, to jość mahčymaść zahadzia zarehistravać svaje pakupki ŭ elektronnaj sistemie polskaj mytni «Viartańnie PDV dla padarožnikaŭ». Kožny ček Tax Free nieabchodna rehistravać asobna. U vypadku pierasiačeńnia miažy na aŭtamabili najaŭnaść elektronnaj rehistracyi daje prava prachodžańnia mytni ŭ pałasie «Tax Free / E-Service».
Jak viarnuć hrošy, kali skarystaŭsia pasłuhami kampanij-pasrednikaŭ
Kali vy skarystalisia pasłuhami mižnarodnych kampanij-pasrednikaŭ, to, kab viarnuć hrošy, možna:
1) Źviarnucca ŭ punkt viartańnia Tax Free u toj krainie, dzie była ździejśniena pakupka.
Zvyčajna takija punkty paznačany nadpisam Tax Free Cash Refund. Ich možna znajści ŭ aeraporcie albo na vakzale (šukać kala kram Duty Free), a taksama ŭ handlovych centrach i abmieńnikach.
U aeraporcie albo na vakzale možna źviarnucca ŭ punkt viartańnia hrošaj tolki paśla prachodžańnia mytnaha kantrolu. Adpaviedna, praštampavanyja čeki Tax Free pradjaŭlajucca adrazu. Hrošy taksama vydajucca adrazu, najaŭnymi albo na bankaŭskuju kartku.
U punktach viartańnia Tax Free, što znachodziacca ŭ handlovych centrach albo ŭ abmieńnikach, možna aformić papiaredniuju kampiensacyju Tax Free. Papiaredniuju, bo biez prachodžańnia mytni niemahčyma pradjavić praštampavanyja čeki Tax Free.
Abaviazkovaj umovaj atrymańnia takoj kampiensacyi źjaŭlajecca toje, što aryhinały praštampavanych čekaŭ Tax Free, jakija vy atrymajecie na mytnym kantroli, u stroha vyznačany termin buduć vysłanyja na adras kampanii-pasrednika.
U advarotnym vypadku kampiensacyja na kartku albo nie pastupić, albo, kali srodki byli vypłačanyja adrazu i najaŭnymi, naličanaja suma z kartki budzie śpisanaja.
2) Paśla viartańnia ŭ Biełaruś źviarnucca ŭ adździaleńni «Technabanka», jakija zajmajucca viartańniem Tax Free. Akramia Minska, takija adździaleńni jość u Homieli i Mahilovie.
«Technabank» absłuhoŭvaje takija mižnarodnyja kampanii, jak Global Blue, Premier Tax Free, Tax Free Worldwide, Tax Card i Litofolija Tax Free. Hrošy viartajucca najaŭnymi i adrazu. Što tyčycca sumy kamisijnaha zboru, to jana adroźnivajecca ŭ zaležnaści ad taho, čeki jakoj kampanii viartajucca.
3) Adpravić na adras kampanii-pasrednika praštampavany ček Tax Free i svaje dadzienyja.
Hrošy ŭ takim vypadku viartajucca na bankaŭskuju kartku, numar jakoj ukazany ŭ dakumientach. Siaredni termin viartańnia hrošaj — 45 dzion. Pry hetym adpravić dakumienty možna jašče na mytni, apuściŭšy kanviert z adpaviednymi dakumientami ŭ admysłovuju skryniu tax-free. Možna taksama adpravić dakumienty zvyčajnym paradkam — praz adździaleńni pošty.
Dakumienty na atrymańnie Tax Free adpraŭlajucca ŭ śpiecyjalnym kanviercie, jaki vydajecca pry afarmleńni błankaŭ Tax Free. Na hetym ža kanviercie ŭkazany adras, na jaki nieabchodna adpraŭlać list. Adras možna taksama ŭdakładnić na aficyjnym sajcie kampanii-pasrednika.
Važna: kali vy płanujecie zabirać kampiensacyju praź bieznajaŭny raźlik, to varta zahadzia pravieryć, ź jakimi vidami bankaŭskich kartak pracuje vaša kampanija-pasrednik, i pry nieabchodnaści zavieści adpaviednuju kartku.
Da ŭvahi: pa polskich čekach Tax Free padatak viartajecca tolki najaŭnymi. Atrymańnie hrošaj na bankaŭskuju kartku albo na bankaŭski rachunak niemahčyma. Kali, znachodziačysia ŭ Polščy, vy skarystalisia pasłuhami Global Blue, nie treba adpraŭlać praštampavanyja čeki Tax Free na adras hetaj kampanii. Na terytoryi Biełarusi hrošy možna viarnuć tolki ŭ adździaleńniach «Technabanka».
Poŭny zvarot PDV u Litvie i Polščy
U susiednich Litvie i Polščy dziejničajuć nacyjanalnyja sistemy viartańnia Tax Free, karystańnie jakimi daje mahčymaść viarnuć PDV u poŭnym abjomie.
Poŭny zvarot PDV u Litvie
Dla taho, kab viarnuć poŭnuju sumu PDV na pakupki ŭ Litvie, nieabchodna paśla pakupki zapoŭnić dekłaracyju na viartańnie padatku — PVM gražinimo deklaracija (forma FR0420), a paśla na praciahu 3-ch miesiacaŭ viarnuć aformlenuju na mytni dekłaracyju ŭ kramu, dzie byŭ nabyty tavar.
Hrošy viartajucca najaŭnymi paśla adpaviednaj pravierki dakumientaŭ. Viartać bieznajaŭnymi našmat składaniej, treba mieć litoŭski rachunak. Na zamiežny rachunak hrošy pieravieści taksama možna, ale za heta budzie spahnana niemałaja kamisija.
Karysnaja infarmacyja: kramy, dzie možna aformić poŭny zvarot PDV, — Senukai (sietka kram z haspadarčymi tavarami), BALSANA , ARSAN, iStore, NCS, Topocentras i niekatoryja inšyja. Adnak ich kolkaść nievialikaja.
Poŭny zvarot PDV ŭ Polščy
Nacyjanalnaja sistema viartańnia PDV ŭ Polščy taksama praduhledžvaje, što padatak budzie viernuty ŭ toj kramie (albo adnoj z kram handlovaj sietki), u jakoj była ździejśniena pakupka. Hrošy viartajucca tolki najaŭnymi, u złotych paśla pradjaŭleńnia pašparta i aryhinalnaj formy Tax Free z pastaŭlenymi mytnymi piatačkami. Adpaviedna dla taho, kab atrymać Tax Free, tavar nieabchodna vyvieźci z krainy, a paśla paŭtorna viarnucca za hrašyma z aryhinałami čekaŭ Tax Free i pašpartam.
Handlovyja kropki, što pracujuć u dadzienaj sistemie, paznačany admysłovym znakam: biełaja naklejka ź zialonaj ramkaj i nadpisam ZWROT VAT, TAX FREE DLA PODRÓŻNYCH albo TAX FREE FOR TOURIST.
Važna: termin viartańnia čekaŭ pa polskich Tax Free abmiežavany i adroźnivacca ŭ zaležnaści ad kramy. Maksimalny termin viartańnia moža być 10 miesiacaŭ. Adnak pradaviec maje prava ŭstalavać inšy. Tamu pry afarmleńni Tax Free važna ŭdakładnić maksimalny čas, praź jaki varta viarnucca, kab zabrać hrošy.
Da ŭvahi: kali vy płanujecie, što hrošy pa vašych čekach budzie zabirać niechta inšy — svajak ci siabar, — davieranaść lepš za ŭsio aformić u kramie padčas afarmleńnia čekaŭ Tax Free. Tut ža možna ŭziać uzor dakumienta. Nataryjalnaha zaćvierdžańnia davieranaści nie patrabujecca.
Karysnaja infarmacyja: siarod najbolš viadomych sietkavych kram, jakija pracujuć z nacynalnaj sistemaj viartańnia Tax Free ŭ Polščy, kramy RTVEuroAGD, MediaMarkt, MediaExpert, Bedronka i inšyja.
Da ŭvahi: u polskich kramach bytavoj i elektronnaj techniki možna sustrecca z najaŭnaściu abmiežavańniaŭ na afarmleńnie Tax Free pry pakupcy niekalkich adnatypnych adzinak tavaru. Heta źviazana z tym, što, pavodle zakanadaŭstva, Tax Free afarmlajecca tolki na tavary, nabytyja dla ŭłasnaha karystańnia. U vypadku nieabchodnaści kupić bolš za adnu adzinku adnatypnaj bytavoj techniki albo elektroniki, možna aformić adzin z čekaŭ Tax Free na inšuju asobu. Jašče varyjant — nabyć tavar praź niekalki miesiacaŭ.
Ci moža atrymać Tax Free nie ŭłaśnik čekaŭ?
Tak. Ale dla hetaha na jaho pavinna być aformlena davieranaść. Razam z davieranaściu pradjaŭlajecca kopija pašparta paručalnika.
U jakich vypadkach čeki Tax Free nie afarmlajucca?
Čeki Tax Free nie afarmlajucca, kali zamiežny hramadzianin znachodzicca na terytoryi krainy, dzie była ździejśniena pakupka, bolš za paŭhoda (184 dni), maje dazvoł na žycharstva ŭ hetaj krainie albo prava na pracu.
Pryjemnych padarožžaŭ i vyhadnych nabytkaŭ!
