Vypraŭlajučysia ŭ padarožža, va ŭładalnikaŭ chatnich žyvioł časta ŭźnikaje pytańnie: brać hadavanca z saboj ci pakinuć doma pad nadziejnym nahladam? Kali vy ŭsio ž vyrašyli nie rasstavacca sa svaim ulubioncam, to treba zapaścisia ciarpieńniem i jak śled padrychtavacca da vandroŭki.
Papiaredniaja padrychtoŭka
Rychtavacca da pajezdki z hadavancam nieabchodna zaranioŭ i być hatovym da vydatkaŭ, asabliva, kali płanujecie vandroŭku za miažu.
U kožnaj krainie isnujuć svaje praviły ŭvozu žyvioł, tamu lepš jašče pry płanavańni padarožža ŭdakładnić usiu nieabchodnuju infarmacyju ŭ adpaviednym konsulstvie ci padraździaleńni, što ažyćciaŭlaje vieterynarny kantrol.
Dla padarožža z hadavancam pa Biełarusi dastatkova mieć pry sabie vieterynarny pašpart na žyviołu z adznakaj ab vakcynacyi suprać šalenstva i vieterynarnaje paśviedčańnie (forma № 1). Nie treba zabyvacca pra ašyjnik, namordnik ci kletku ŭ zaležnaści ad pamieraŭ hadavanca.
Pry vyjeździe na terytoryju Mytnaha sajuza treba mieć vieterynarny pašpart mižnarodnaha ŭzoru z adznakaj ab vakcynacyi suprać šalenstva i vieterynarny siertyfikat (forma № 1).
Dla pajezdki ŭ krainy Jeŭrasajuza abaviazkovymi źjaŭlajucca pašpart mižnarodnaha ŭzoru, vieterynarny siertyfikat (forma № 6), pryščepka suprać šalenstva, čypavańnie i kliničny ahlad žyvioły za sutki da adjezdu.
Fota z sajta vetmed.by.
Vieterynarny pašpart mižnarodnaha ŭzoru — heta aficyjny vieterynarny dakumient, u jakim paznačana asnoŭnaja infarmacyja pra žyviołu (fota hadavanca, jaho mianuška, data naradžeńnia, paroda, afarboŭka poŭści, asablivyja prykmiety, klajmo, numar elektronnaha čypa i h.d.) i jaho ŭładalnika (proźvišča, imia, imia pa baćku i telefon). Taki dakumient afarmlajecca tolki ŭ vietklinikach, jakija majuć licenziju na ažyćciaŭleńnie vieterynarnaj dziejnaści.
(Vietkliniki Minska: adrasy, košty i telefony).
Košt vietpašparta: 3,50 (1 rubiel — za afarmleńnie, 2,50 — za pašpart).
Kali vy zaviali hadavanca i płanujecie ź im padarožničać, — metazhodna zavodzić vietpašpart razam z čypavańniem, što ŭ dalejšym sprościć atrymańnie dazvołu na vyvaz žyvioły za miažu.
Vakcynacyja
Kab padarožža z vašym čatyrochłapym siabram było kamfortnym, treba svoječasova zrabić nieabchodnyja pryščepki.
Dobryja haspadary pilna sočać za zdaroŭjem svaich hadavancaŭ i nikoli nie prapuskajuć płanavuju vakcynacyju. I kali ŭ vašaha sabaki ci kata jość vietpašpart z usimi nieabchodnymi pryščepkami, to šmat času na zbory nie spatrebicca. Kali ž žyvioła ciaham hoda nie była pryščeplena, to vakcynacyja pravodzicca nie paźniej, čym za 2 tydni pierad adjezdam.
Apošniaja pryščepka ad šalenstva pavinna być zroblena nie raniej, čym za hod, i nie paźniej, čym za 2 miesiacy pierad vyjezdam.
Košt pryščepki: 10 rubloŭ + košt vakcyny.
Čypavańnie
Dla vyjezdu ŭ krainy Jeŭrasajuza patrabujecca abaviazkovaje čypavańnie žyvioł. Heta pracedura ŭviadzieńnia pad skuru śpiecyjalnaj kapsuły, jakaja ŭtrymlivaje infarmacyju pra ŭładalnika i stan zdaroŭja žyvioły. Darečy, čypavańnie budzie karysnym nie tolki dla vyvazu hadavanca za miažu, ale i dla pošuku ŭ vypadku jaho prapažy.
Košt: 30 rubloŭ (10 rubloŭ — pracedura, 20 rubloŭ — košt čypa).
(Usie košty — z sajta adnoj ź minskich vietklinik).
Uvaha! Pavodle patrabavańniaŭ Jeŭrasajuza, vieterynarny pašpart žyvioły pavinien być vypisany dataj, paźniejšaj za datu čypavańnia. Adpaviedna, usie vakcynacyi, zroblenyja da čypavańnia, buduć ličycca niesapraŭdnymi.
Tamu metazhodna spačatku ščaniuka ci kaciania čypavać, aformić vieterynarny pašpart, a ŭžo paśla rabić usie nieabchodnyja pryščepki.
Vieterynarnyja daviedki i dazvoły
Za try dni da adjezdu nieabchodna razam z hadavancam naviedać miascovaje adździaleńnie vieterynarnaj słužby, kab atrymać daviedku ź infarmacyjaj ab zdaroŭi žyvioły, pryščepkach, adznakaj ab dehielmityzacyi i h.d. Naprykład, kali vyjazdžajecie z hadavancam u Polšču, daviedka pavinna być na anhlijskaj i polskaj movach. Za vydaču daviedki daviadziecca zapłacić.
(Tut vy znojdziecie ceny na pasłuhi, jakija akazvajucca dziaržustanovaj «Minskaja haradskaja vieterynarnaja stancyja»).
Uvaha! Dla pajezdki ŭ krainy Jeŭrasajuza kliničny ahlad žyvioły robicca za sutki da adjezdu.
Hetyja dakumienty razavyja, h.zn. dziejničajuć tolki na čas transparciroŭki. Pierad viartańniem rekamiendujecca ŭziać padobnyja dakumienty ŭ punkcie vieterynarnaj dapamohi ŭ krainie znachodžańnia.
I apošniaje, heta tyčycca tolki sabak: kali vaš hadavaniec parodzisty, nieabchodna atrymać dazvoł na vyvaz — daviedku, što vy nie vyvozicie za miažu supierkaštoŭnaha źviera. Kali jość radasłoŭnaja, to daviedka nie patrebnaja. A kali niama, — daviadziecca vieści sabaku ŭ kłub na ahlad.
Kab zrabić usio pravilna i ničoha nie nabłytać, lepš jašče na etapie płanavańnia zamiežnaj pajezdki prakansultavacca ŭ śpiecyjalistaŭ.
Pieravozka chatnich žyvioł
Nu što ž, kali składanaści vas nie pužajuć i ničoha nie zaminaje padarožžu, varta nahadać, što pieravozić žyvioł možna tolki z papiaredniaj zhody pieravozčyka. Heta značyć, što pra palot ci pajezdku sa svaim ulubioncam treba paviedamić jašče pry braniravańni bileta i adrazu ž udakładnić apłatu i ŭsie patrabavańni avija- ci čyhunačnaj kampanii. Pavodle zakonu, usimi vidami hramadskaha transpartu možna pieravozić lubych chatnich žyvioł, za vyklučeńniem vialikich sabak.
(Praviły pieravozki žyvioł avijakampanijaj «Biełavija». Praviły pieravozki drobnych žyvioł i ptušak čyhunkaj — tut).
Padarožža z hadavancam za miažu aŭtamabilem
Najbolš kamfortnaje padarožža z čatyrochłapym siabram, viadoma ž, na ŭłasnym aŭtamabili. Padarožničajučy na aŭto, treba viedać, što na miažy ŭlubionca nieabchodna budzie zadekłaravać i prajści vieterynarny kantrol. Tamu ŭ punkcie propusku abirajem «čyrvony» kanał.
Na zvarotnym šlachu (pry ŭjeździe ŭ Biełaruś), pierad prachodžańniem mytnaha kantrolu, treba źviarnucca ŭ punkt vieterynarnaha kantrolu, dzie, paśla ahladu žyvioły, na ŭjaznym tałonie stavicca piačatka. Jechać taksama treba na «čyrvony» kanał.
Ščaślivaj darohi!
Kali dla vašaha chatniaha hadavanca daroha — sprava zvykłaja, to ŭsie kłopaty, źviazanyja z padarožžam — drobiazi. Zatoje vam nie daviadziecca pakidać svajho ŭlubionca na čužych ludziej i ŭvieś čas za jaho chvalavacca. Tamu zyčym vam i vašamu čatyrochłapamu siabru ščaślivaj darohi!
