Fota: belvisit.com.
Aktyvistka Zadzinočańnia biełaruskich studentaŭ Darja Baranoŭskaja raspaviała «Našaj Nivie» pra padziei, jakija adbylisia na dniach u Ščučynskim rajonie. 20—27 lipienia na terytoryi siadziby Śviatapołk-Čaćviarcinskich u vioscy Žałudok musiŭ adbycca letnik Zadzinočańnia, ale pierad samym jaho startam uładalnicu siadziby vyklikali ŭ rajvykankam. Paśla hetaha jana rezka pieradumała prymać haściej.
Jašče hod tamu, vandrujučy aŭtastopam pa Biełarusi, Darja Baranoŭskaja naviedała siadzibu ŭ Žałudku. Dziaŭčyna na svaje vočy ŭbačyła na jaje terytoryi śmiećcie. I kali Darja bližej paznajomiłasia z haspadyniaj siadziby Safijaj Haŭryłavaj, to prapanavała nastupnym letam zładzić tut vałanciorski letnik, adnoj z met jakoha budzie jakraz prybirańnie śmiećcia.
Kamunikacyja z Safijaj adnaviłasia ŭ krasaviku. Atrymaŭšy ad Haŭryłavaj dazvoł na pryjezd hrupy studentaŭ u Žałudok, Darja z kalažankaj pačała zajmacca arhanizacyjnymi momantami. Płanavałasia, što ŭsie achvotnyja padaduć zajaŭku na adpačynak u letniku, zdaduć hrošy na ježu i z 20 da 27 lipienia buduć žyć u Žałudku ŭ namiotach, prybiracca i adpačyvać. Takich achvotnych naźbirałasia 21 čałaviek, usie jany kupili kvitki. Dziela svaich budučych haściej uładalnica siadziby navat nabyła elektryčnuju plitku, kab jany mieli mahčymaść hatavać ježu.
Ale za 3 dni da startu letnika Safija adkazała, što ŭsio admianiajecca, bo ŭ tyja ž daty «zapłanavanyja bujnyja ramontnyja raboty pad kiraŭnictvam navukovaha supracoŭnika». Paśla hetaha haspadynia zusim pierastała vychodzić na suviaź z arhanizatarkami. Kali Darja ŭsio ž datelefanavałasia Safii, to pačuła, što «ŭsio treba było zahadzia ŭzhadniać z uładami, tady b prablem nie było».
Pazicyja haspadyni siadziby nakont patencyjnych haściej źmianiłasia litaralna za niekalki dzion.
«Ja śpiecyjalna patelefanavała na prachadnuju siadziby, kab vyśvietlić, ci sapraŭdy ŭ hetyja daty ŭvachod tudy budzie zabaronieny. Na što mnie adkazali, što pryjazdžać možna spakojna, tolki varta zahadzia papiaredzić. Kali ž žančyna na tym kancy provada pačuła, što cikaviacca hrafikam «tyja samyja vałanciory», to pierajšła na bolš strohi ton i vydała, što my zajmajemsia antysavieckaj prapahandaj i kali my pryjedziem, to jany vykličuć milicyju», — raspaviała arhanizatarka. I dadała:
«Da samoj haspadyni ŭ mianie pretenzij niama, jana vielmi nam dapamahała. Ale bačna, što jaje zapužali, jana zusim pierastała sa mnoj kantaktavać».
My datelefanavalisia Safii Haŭryłavaj, ale jana admoviłasia ad lubych kamientaroŭ pa temie.
A voś u adździele ideałohii Ščučynskaha rajvykankama paćvierdzili, što razmova pra letnik u Žałudku ŭ ich kabinietach viałasia: «Ad haspadyni siadziby my zrazumieli, što da jaje pryjeduć vałanciory, studenty, jakija buduć prybirać terytoryju, ale my patłumačyli, što patrebna aformić aficyjnuju zajavu (paznačyć, chto pravodzić letnik, jaho mety, zadačy, adkaznych, kolkaść udzielnikaŭ i hetak dalej). Usio heta — u imia biaśpieki. Uzor zajavy ja haspadyni dasłała, ale zajavu nam nichto z arhanizataraŭ mierapryjemstva nie dasłaŭ. Na hetym naš dyjałoh skončyŭsia. Chto b nios adkaznaść, kali b niechta z maładych ludziej patapiŭsia ŭ rečcy? Akramia taho, my bačyli na sajcie Zadzinočańnia, što ŭ miežach letnika płanavałasia nie prosta prybirać śmiećcie, a jašče ładzić i niejkuju kulturnuju prahramu — heta ŭžo masavaje mierapryjemstva. Zajavu možna było napisać za paru dzion, ale nichto ničoha nie zrabiŭ. My pravodzić letnik nie zabaraniali, ale dali zrazumieć, što biez zajavy za ŭsie nastupstvy budzie adkazvać Safija Haŭryłava».
U rajvykankamie zapeŭnili, što hałoŭnaj metaj ich razmovy z haspadyniaj siadziby staŭ kłopat pra «zabiaśpiačeńnie biaśpieki dla studentaŭ». Ale čamu pra biaśpieku zhadali tolki za niekalki dzion da startu letnika — tut užo zastajucca pytańni.
