Jehipiecki sud prysudziŭ da vyšejšaj miery pakarańnia 75 čałaviek za ŭdzieł u chvalavańniach, jakija adbylisia ŭ krainie paśla adchileńnia ad ułady Machamieda Mursi ŭ 2013 hodzie.
Siarod asudžanych na śmierć — lidary partyi «Braty- musulmanie». Usiaho pa hetaj spravie prachodzili 700 čałaviek.
Pravaabarončaja arhanizacyja «Mižnarodnaja amnistyja» nazvała sudovy praces nadzvyčaj niespraviadlivym, adznačyŭšy, što jon parušaje kanstytucyju Jehipta.
Machamied Mursi, ciesna źviazany ź isłamisckaj arhanizacyjaj «Braty-musulmanie», znachodziŭsia va ŭładzie ŭ krainie kala hoda.
U 2013 hodzie jon byŭ zrynuty padčas vajennaha pieravarotu. Prychilniki Mursi mocna pratestavali: jany vyjšli na šmatdzionnyja demanstracyi, pastavili namiotavyja miastečki ŭ Kairy i paśla ich razhonu praviali «marš hnievu» pa ŭsioj krainie.
U mnohich haradach krainy adbylisia krovapralitnyja sutyknieńni, u jakich zahinuli bolš za 600 čałaviek.
«Braty-musulmanie» arhanizavali ŭzbrojeny napad na palicejskaje adździaleńnie - u pierastrełcy z bajavikami zahinuli niekalki dziasiatkaŭ palicejskich.
Paśla hetaha novyja ŭłady Jehipta pad kiraŭnictvam Abduły Fatacha-Sisi, što vyjhraŭ vybary, razharnuli pieraśled «Bratoŭ-musulman»: sotni členaŭ hetaj arhanizacyi byli zabityja, tysiačy padvierhnulisia aryštam.
