Pamior aŭtar znakamitaha ramana «Žyćcio i niezvyčajnyja pryhody sałdata Ivana Čonkina» piśmieńnik, dramaturh i paet Uładzimir Vajnovič. Pra heta sa spasyłkaj na siamju piśmieńnika paviedamlaje TASS.
Žonka piśmieńnika Śviatłana Kaleśničenka skazała ahienctvu, što «z dataj i miescam raźvitańnia pakul jašče nie vyznačylisia, ale pachavańnie buduć, chutčej za ŭsio, u paniadziełak».
Vajnovič naradziŭsia 26 vieraśnia 1932 hoda ŭ horadzie Stalinabad (sučasny Dušanbe) u Tadžykskaj SSR.
U 1956 h. pryjechaŭ u Maskvu, vučyŭsia na histaryčnym fakultecie Piedahahičnaha instytuta. Pracavaŭ redaktaram na radyjo. Staŭ viadomy paśla napisanaj na jaho vieršy pieśni «14 chvilin da startu», pryśviečanaj savieckim kasmanaŭtam. Vajnovič drukavaŭsia ŭ «Novym miry» i inšych časopisach.
Raman pra sałdata Čonkina Vajnovič pačaŭ pisać ŭ 1963 hodzie. Spačatku jon chadziŭ u samvydacie, a paźniej byŭ apublikavany ŭ Frankfurcie-na-Majnie. Usia kniha ŭpieršyniu vyjšła ŭ śviet 1975 hodzie ŭ Paryžy. Siarod viadomych tvoraŭ piśmieńnika byli taksama «Pretendent na tron», «Pieramieščanaja asoba»,«Maskva-2042».
U śniežni 1980 savieckija ŭłady vysłali Vajnoviča z SSSR, a paźniej jon byŭ pazbaŭleny hramadzianstva, jakoje jamu viarnuli tolki ŭ 1990 hodzie.
Vajnovič šmat zajmaŭsia pravaabarončaj i dysidenckaj dziejnaściu ŭ SSSR, jon da apošnich dzion vystupaŭ z zajavami na aktualnyja palityčnyja temy. U mai 2018 hoda jon byŭ siarod tych, chto padpisaŭ zajavu asacyjacyi «Volnaje słova» z patrabavańniem pieradać asudžanaha ŭ Rasii Aleha Siancova uładam Ukrainy.
