Amierykanskija IT-kampanii ŭsio čaściej šukajuć novych supracoŭnikaŭ biez techničnaj adukacyi. Bolš za 4 z 10 vakantnych miescaŭ u technałahičnym siektary źjaŭlajucca «nietechničnymi» — takija dadzienyja pryvodziacca ŭ spravazdačy analityčnaj kampanii Glassdoor.
Analityki sabrali razam dadzienyja miljonaŭ vakansijaŭ amierykanskich technałahičnych kampanijaŭ. Jak vyjaviłasia, značnaja častka ź ich nie vymahaje ad pretendenta ŭmieńnia prahramavać ci inšych śpiecyfičnych technałahičnych viedaŭ.
Jak tak moža być?
Reč u tym, što čym bolšaj robicca IT-kampanija, tym šyrejšym robicca śpiektr supracoŭnikaŭ, jakija patrabujucca joj dla taho, kab vieści dy pašyrać biźnies.
Kampanii pačynajuć šukać nie tolki soft-inžynieraŭ i śpiecyjalistaŭ pa dadzienych, ale i mieniedžaraŭ pa prodažach, prajektnych mieniedžaraŭ, a taksama HR-śpiecyjalistaŭ (pa-staromu kažučy, «kadravikoŭ»).
Što praŭda, čałaviek biez dośviedu prahramavańnia musić raźličvać na mienšy zarobak u amierykanskich IT-kampanijach — u siarednim $73,5 tysiačy na hod. A voś techničnyja śpiecyjalisty tam zarablajuć u siarednim $98,4 tysiačy — prynamsi, pavodle toj vybarki, jakoj karystałasia Glassdoor.
Adnak patreba ŭ techničnych viedach nikudy nie padziełasia. Bolš za toje — navat tradycyjna nie źviazanyja z technałohijami pasady buduć vymahać ad supracoŭnikaŭ usio bolej techničnaha dośviedu, naprykład vałodańnia HTML ci infarmacyjnym analizam. Ale fakt zastajecca faktam — śfiera IT ciapier naležyć užo nie tolki adnymi hikam-prahramistam, ale i jurystam, markietołaham, dy navat «commodity managers» — sučasnamu anałahu «zahadčyka haspadarki».
Usio heta pierahukajecca ź niadaŭnim manifiestam hranda ajčynnaha IT-biźniesu Viktara Prakapieni pad nazvaj «Jak humanitaryju atrymlivać IT-šny zarobak».
Prakapienia ŭ svaim dopisie ŭ fejsbuku pryvioŭ prykład čałavieka, jaki pryjšoŭ u jaho kampaniju z nulavymi viedami prahramavańnia, ale damohsia-taki svajho z dapamohaj fanatyčnaj pracy i samaadukacyi. Biełaruskim technałahičnym kampanijam usio bolš treba ludzi, jakija dapamohuć raści ich biźniesu — a heta nie tolki «ajcišniki» ŭ strohim sensie słova. Prakapienia śćviardžaje, što humanitaryj taksama moža atrymlivać zarobak na ŭzroŭni z prahramistami, ale dla hetaha treba być hatovym pracavać pa 16 hadzinaŭ u sutki, šmat vučycca, pažadana viedać zamiežnyja movy (anhlijskuju dyk uvohule abaviazkova) i mieć dośvied žyćcia za miažoj. A voś biełaruski dypłom jaho jak pracadaŭcu nie cikavić — hałoŭnaje, kab «vočy hareli».
