U Babrujsku zabili dźviuch maładych žančyn, adna ź jakich paśpieła paviedamić pra niebiaśpieku ŭ milicyju. Jany ź siabroŭkaj začynilisia ŭ vannym pakoi, pakul tudy łamiŭsia ich zabojca.
Čytajcie: U Babrujsku zabili dźviuch žančyn. Jany patelefanavali ŭ milicyju, ale vyratavać ich nie paśpieli
Mo ich i ŭdałosia b vyratavać, kali b žančyna nazvała dakładny adras — ale jany nie viedali, da kaho i kudy pajechali, sprava adbyvałasia ŭ spalnym rajonie.
Babrujskaja milicyja šukała miesca padziei amal poŭnym składam, supracoŭniki praviarali ŭsie šmatkvaternyja žyłyja damy pa vulicy Łyńkova i susiedniaj terytoryi.
Ale vyličyć asobu mužčyny ŭdałosia tolki paśla pravierki kamier nazirańnia ŭ adnoj z kaviarań, dzie było vidać, jak dźvie dziaŭčyny 26 i 27 hod paznajomilisia z mužčynam i razam źjechali.
Čytajcie taksama: Padazravany ŭ žorstkim zabojstvie dźviuch žančyn u Babrujsku — chto jon. FOTY
Padazravany ŭ zabojstvie, 36-hadovy A.
Užo identyfikavaŭšy jaho i miesca jahonaha žycharstva, udałosia znajści kvateru, dzie adbyłasia trahiedyja.
Niechta ŭ kamientarach da naviny čorna iranizuje, što «kali b šukali palityčnaha, to pa zvanku zapielenhavali b i chutka znajšli, a tut prosta dzieŭki».
A nasamreč — ci mahła b milicyja značna zvuzić sabie koła pošukaŭ?
My pahavaryli pra heta ź niekalkimi supracoŭnikami Ministerstva ŭnutranych spraŭ, siarod jakich rabotniki dziažurki i śpiecyjalisty pa vyšuku i elektronicy.
«Pačniom z taho, što ŭ dziažurkach stajać telefony navat biez aŭtamatyčnaha vyznačalnika numara — nielha daviedacca, ź jakoha numara vyklik, treba rabić zapyt u vuzieł suviazi.
Nijakich mahčymaściaŭ pryniać vyklik pa sučasnych kanałach — telehramie ŭmoŭnym ci kantakcie — niama. Što rabić u razie čaho hłuchaniamomu čałavieku? Niezrazumieła. Možna padumać, što i ŭ kankretna hetym vypadku praź miesiendžar možna było atrymać bolš udakładniajučych detalaŭ. Kankretna
ŭ ADS [apieratyŭna-dziažurnaja słužba] niama abstalavańnia, kab «pielenhavać» fizičnaje znachodžańnie čałavieka, jaki nam zvonić.
Adrazu heta moža zrabić, tearetyčna, departamient apieratyŭna-vyšukovaj dziejnaści [DAVD], ale dziažurnyja čaści nijakaha dačynieńnia da DAVD nie majuć, heta absalutna roznyja struktury. ADS uvachodzić u Milicyju hramadskaj biaśpieki i nie moža pravodzić apieratyŭna-vyšukovyja mierapryjemstvy, DAVD uvachodzić u kryminalny błok. Ja mušu pryznać, što abstalavańnie dziažurak zavisła na ŭzroŭni 80-ch hadoŭ. Na Zachadzie i ŭ dziažurkach takoje abstalavańnie, jakoje ŭ nas tolki ŭ apieratyŭnikaŭ i pad hryfam «sakretna». Tak, heta doraha. Ale čym my vymiarajem darahaviznu? Čałaviečym žyćciom», — advioŭ nam dušu supracoŭnik dziažurki adnaho z rajonnych haradoŭ.
Jaki zvyčajna miechanizm pošuku vykarystoŭvajecca ŭ takich vypadkach, kolki treba času i jakaja minimalnaja terytaryjalnaja chiba?
«Heta budzie 100—500 mietraŭ plus-minus, pry ŭmovie, što rabotniki mabilnaha apieratara buduć na pracoŭnych miescach. I heta va ŭmovach haradskoj zabudovy. Słovam, budzie viadomaja tolki mabilnaja vieža, jakaja pryniała sihnał mabilnika — najbližejšaja da jaho. A dalej biareš cyrkul u ruki, pravodziš akružnaść i nožkami. Heta kłasičnaja schiema, tak i było zroblena ŭ hety raz. A vyznačyć pavierch u šmatkvaternym domie i padjezd — heta ŭžo nie paddajecca vyličeńniu», — skazaŭ nam apieratyŭnik.
Kamientujučy słovy supracoŭnika dziažurki ab apieratyŭnym abstalavańni, jon skazaŭ, što i heta nie panaceja.
«Takoje abstalavańnie jość u abłasnych haradach. Kolki treba času, kab usio uzhadnić i davieźci jaho ŭ Babrujsk va ŭmovach, kali lik idzie na niejkija chviliny? Pytańnie rytaryčnaje. I znoŭ ža, jano trochi zvuzić kvadrat pošukaŭ, ale kankretnaj kvatery nie pakaža», — dadaŭ jon.
Jašče adzin ekśpiert skazaŭ, što aceńvaje dziejnaść kaleh z MUS stanoŭča. Va ŭmovach, kali viadoma tolki prykładnaje miesca, jany dziejničali pravilna. Jany zrabili ŭsio mahčymaje, kinuŭšy ludziej i «ŭ pole», i na analiz haradskoha videa.
«Heta tolki ŭ amierykanskich bajevikach tabie pakažuć dakładnaje miesca adrazu na interaktyŭnaj mapie. Ale tut my majem situacyju, kali hetych žančyn nie «viali» metanakiravana, nie było dostupaŭ da ich hieałakacyj i hetak dalej. A tut jany rezka traplajuć u pole zroku… Ja b nie vinavaciŭ milicyju.
Tak, na Zachadzie techzabieśpiačeńnie lepšaje, chiba ŭ mietrach mienš, adpaviedna. Ale miechanizm taki ž samy — vyznačaješ sotu i dalej sam, zychodziačy sa svajoj fantazii, pačućcia i imaviernaha maršrutu», — padsumavaŭ aficer.
