17 lipienia ŭ sudzie Savieckaha rajona Minska ahučyli prysud žurnalistu Źmitru Hałko. Prakuror prasiŭ asudzić Hałko na 3 hady. Sudździa Alaksandr Jakunčychin prysudziŭ Hałko da 4 hadoŭ «chimii».

Žurnalista vyzvalili ŭ zale suda. Pakul jon pad padpiskaj ab niavyjeździe. U miesca adbyćcia pakarańnia jaho adpraviać paźniej.

Pad vartaj, dzie adzin dzień idzie za dva dni «chimii», Hałko byŭ ad krasavika.

38-hadovaha Hałko vinavacili ŭ hvałcie ŭ dačynieńni da milicyjanta. Sam žurnalist vinu nie pryznaŭ.

Žurnalist zajaviŭ, što prysudam nie zadavoleny.

«Ja ž usio roŭna faktyčna budu siadzieć za 1,5 tysiačy kiłamietraŭ ad siamji i małoha syna. Jany spadziajucca, što mianie adpraviać na chimiju i pra hetuju spravu ŭsie zabuduć. Kab ja sieŭ u kałoniju — pra mianie b pamiatali», — kaža Źmicier Hałko.

Jon ličyć, što spraviadliva było b jaho apraŭdać.

Ale ž čamu Źmicier pajechaŭ u Biełaruś, kali viedaŭ, što znachodzicca ŭ vyšuku?

Hałko tłumačyć tak:

«Ja nie razumieŭ, što za sprava na mianie zaviedziena, dumaŭ, moža heta niejkaja pamyłka i spadziavaŭsia, što sprava razvalicca. Ale ciapier ja ŭpeŭnieny, što hałoŭny składnik majoj spravy — palityčny».

Źmitra Hałko zatrymali ŭ krasaviku na biełaruska-ŭkrainskaj miažy i źmiaścili pad vartu. Pačałasia ŭsia hetaja historyja jašče ŭ 2017 hodzie. 25 listapada Jan-Chryścijan, 15-hadovy syn žurnalista ad pieršaha šlubu, śviatkavaŭ svoj dzień narodzinaŭ razam ź siabrami. Źmicier Hałko byŭ u kvatery «za starejšaha». Na šum vyklikali milicyju, dalej viersii adroźnivajucca. Milicyjanty śćviardžali, što Hałko šturchaŭ ich, biŭ pa rukach, u bojcy ŭdzielničaŭ navat jaho pjany 15-hadovy syn. Hałko ž zapeŭnivaŭ, što prosta ŭziaŭ milicyjanta pad ruku i zaprasiŭ pakinuć kvateru. Paśla zdareńnia žurnalist atrymaŭ štraf za łajanku ŭ publičnym miescy, zatym jon razam z synam źjechaŭ va Ukrainu, dzie žyvie jaho ciapierašniaja žonka. Ale praz peŭny čas syn viarnuŭsia ŭ Biełaruś. Viasnoju i sam Hałko pajechaŭ u Minsk, kab «vyrašyć prablemy z padatkovaj», choć na toj čas i było viadoma, što jon znachodzicca ŭ vyšuku. Pajezdka skončyłasia zatrymańniem, zatrymańnie — źniavoleńniem i sudom.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?