Leanid Sasnoŭski — prosty rečycki rabočy, pracuje na «Rečycadrevie». Na zdaroŭje asabliva nie narakaŭ, uletku prachodziŭ płanavy ahlad na pradpryjemstvie.

Uvosień 2017 hoda ŭ mužčyny pačała baleć hałava, źjavilisia prablemy z dychańniem.

Jaho pakłali ŭ miascovuju balnicu. Praŭda, u infiekcyjnaje adździaleńnie, a nie da otałarynhołaha.

Što było dalej, «Našaj Nivie» raskazaŭ siabra mužčyny — sam chvory ciapier havoryć mała.

«U balnicy Lonia palažaŭ trochu… Vypisali jaho ŭ jašče horšym stanie, z rekamiendacyjaj «schadzić da łora» — prosta ŭ nas infiekcyjonka i łor-adździaleńnie ŭ roznych miescach znachodziacca, — raskazvaje jaho siabra Aleh Šabietnik. — Da łora trapić było ciažka, na aŭtobusie pryjedzieš u palikliniku, a tałonaŭ užo niama. Ludzi padkazali hrafik dziažurstva doktara ŭ balnicy, paraili schadzić u pryjomny pakoj. Jon ź siastroj pajechaŭ da łora, taja nakiravała ŭ Homiel — heta ŭžo ŭ lutym było.

U Homieli hlanuli: maŭlaŭ, kiepska z vami, ale voś vam ukolčyki i tabletki — «kalicie». Pakul kurs lačeńnia byŭ, to, zdajecca, niejkaja adliha nastupiła. Potym znoŭ horš.

Siastra zaviała jaho ŭ płatnuju palikliniku, dyk tam žachnulisia prosta! Skazali: jak heta tak, što nichto nie ŭbačyŭ maštab vašych prablem — u vas hnoj raźjeŭ chraščy, vočy pačali raźjazdžacca, bo i kostki tvaru ŭžo raźjedzienyja. Słovam, apieracyja niepaźbiežnaja. Znoŭ jaho pakłali ŭ balnicu, buduć rabić apieracyju, ale nastupstvy… Kali vyžyvie, to budzie invalidam… «Kali vyžyvie», razumiejecie?! Tak daktary kažuć».

Aleh pakazaŭ nam, jak vyhladaŭ Leanid da chvaroby — heta fota z pašparta. 

«U jaho vočy ŭžo amal nie bačać, vušy amal nie čujuć. Tvar za dva miesiacy staŭ jak u pryšelca, i hetaha nichto nie bačyŭ», — narakaje siabra mužčyny. 

U rečyckaj balnicy, dzie pieršapačatkova lačyŭsia Leanid, ad kamientaroŭ admovilisia. 

«My pradastaŭlajem infarmacyju tolki kampietentnym orhanam», — skazaŭ namieśnik hałoŭnaha doktara Siarhiej Tananykin. 

Na pytańnie, čamu ŭ infiekcyjnaje adździaleńnie nie pryjechaŭ kampietentny otałarynhołah, doktar taksama nie adkazaŭ.

Клас
0
Панылы сорам
0
Ха-ха
0
Ого
0
Сумна
0
Абуральна
3

Chočaš padzialicca važnaj infarmacyjaj ananimna i kanfidencyjna?