Sienat Uźbiekistana apublikavaŭ dla abmierkavańnia prajekt pastanovy, jaki rehłamientuje paradak praviadzieńnia siamiejnych mierapryjemstvaŭ. Dakumient ahavorvaje, u pryvatnaści, kolkaść haściej, jakich možna zaprašać na płoŭ, pieradaje infarmacyjnaje ahienctva «Fierhana».
U prajekcie adznačajecca, što ŭ apošnija hady siamiejnyja cyrymonii adroźnivajucca praźmiernaściu i marnatraŭstvam, hrebujuć nacyjanalnymi tradycyjami i patrabujuć praźmiernych vydatkaŭ. Heta, u svaju čarhu, adbivajecca na finansavym stanie maładych siemjaŭ i pryvodzić da razvodaŭ. Akramia taho, zamiest vychavańnia ŭ moładzi pachvalnych jakaściaŭ niapravilna praviedzienyja siamiejnyja ŭračystaści «pryvodziać da zahanaŭ, takich jak chvalba i raskoša», havorycca ŭ dakumiencie.
Zakanadaŭcy prapanoŭvajuć uvieści hramadski kantrol za siamiejnymi mierapryjemstvami i zaćvierdzić pałažeńnie, zhodna ź jakim, viasielli i inšyja ŭračystaści dazvalajecca pravodzić u pieryjad z 10:00 da 23:00. «Praciah siamiejnych mierapryjemstvaŭ paśla 23:00 nie dapuskajecca», — padkreślivajecca ŭ dakumiencie.
Davać płoŭ (oš), zhodna z prapanavanym praviłam, možna budzie z 12:00 da 15:00. Kolkaść haściej na viasiellach i ŭračystaściach prapanujecca abmiežavać 150, na płoŭ — 200. Na žałobnych cyrymonijach (za vyklučeńniem płovu) kolkaść udzielnikaŭ nie abmiažoŭvajecca.
Dla viasielnych cyrymonij — rehistracyi šlubu i prybyćcia ŭ viasielnuju zału — dazvalajecca vykarystoŭvać nie bolš za dva lehkavyja aŭtamabili. Płatnyja transpartnyja pasłuhi mohuć akazvać tolki licenzavanyja pieravozčyki.
Čynoŭniki i kiraŭniki ŭsich uzroŭniaŭ pavinny ŭłasnymi siamiejnymi mierapryjemstvami padavać prykład i ŭzor maładym siemjam, adznačajecca ŭ dakumiencie.
Sproby abmiežavać razmach viasielnych i inšych uračystaściaŭ u Uźbiekistanie robiacca z časoŭ prezidenta Isłama Karymava, jaki ŭ 1998 i 2008 hadach vydaŭ dva ŭkazy, jakija abmiažoŭvajuć «pampieznaść i praźmiernuju marnatraŭnaść» pry praviadzieńni cyrymonij. Asablivych vynikaŭ hetyja miery nie prynieśli, ale ciapier za baraćbu z raskošaj uziaŭsia prezident Šaŭkat Miryjojeŭ. U žniŭni 2017 hoda padčas vizitu ŭ Taškienckuju vobłaść jon zaklikaŭ čynoŭnikaŭ pryniać miery da ŭparadkavańnia viasielnych uračystaściaŭ, a 5 sakavika 2018 zabaraniŭ im naviedvać viasielnyja ŭračystaści i dni naradžeńnia, zajaviŭšy, što jany žyvuć «raskošnym» žyćciom, a śviaty ź ich udziełam spryjajuć karupcyi.
