Fołk-hurt Pawa razam z opiernymi śpievakami Illoj Silčukovym i Volhaj Vaškievič zapisaŭ biełaruski kavier na pieśniu «Ja svobodien» — adnu z samych viadomych kampazicyj Valeryja Kipiełava. Akcyja prymierkavanaja da vialikaha jubilejnaha kancerta hurta «Kipiełaŭ», jaki adbudziecca 31 sakavika ŭ Pałacy sportu.
U Minsk «Kipiełaŭ» pryviazie najlepšyja pieśni i novy albom «Źviezdy i kriesty». Heta pieršy pryjezd kalektyva ŭ stalicu Biełarusi za 5 hod. Lidar hurta biełaruskuju viersiju «Ja svobodien» užo słuchaŭ i acaniŭ jaje stanoŭča.
— Pračytańnie Pawa mnie spadabałasia, — kaža Valeryj Kipiełaŭ. — Dobra, kali kavier-viersii zrobleny jakasna. A heta mienavita toj vypadak.
Tekst pieśni na biełaruskuju pierakłaŭ fołk-muzyka Vital Voranaŭ. Aranžyroŭku i instrumientalnyja partyi zapisaŭ hurt Pawa, jaki spałučaje ŭ svajoj tvorčaści fołk, rok i elektroniku. Dla lidara kalektyvu kavier staŭ viartańniem u junactva.
— Kipiełaŭ byŭ dla mianie postaćciu numar adzin, kali jašče padletkam u 90-ch ja ŭpadabaŭ rok-muzyku, — raspaviadaje Juryj Pankievič z Pawa. — Ja nabyvaŭ jaho zapisy ŭ składzie hurta «Arija» na kasietach, ja mieŭ usiu atrybutyku taho času: čorny zaplečnik z nadpisam «Ja svobodien», biercy i kasuchu z skurzamu. Usie pieśni i teksty byli zavučanyja na pamiać i pieražytyja. Darečy, heta byŭ moj pieršy rok-kancert — pamiataju, što adbyvaŭsia jon u cyrku. Tamu z zadavalnieńniem pajdu pasłuchać Valeryja i zaraz.
Hałoŭnuju partyju vakała ŭ biełaruskaj viersii «Ja svobodien» vykanaŭ Illa Silčukoŭ — adzin z najlepšych opiernych barytonaŭ Biełarusi, salist Nacyjanalnaha akademičnaha Vialikaha teatra Biełarusi, zaprošany salist viadučych opiernych teatraŭ Italii, Hiermanii, Bielhii, Francyi, Izraila, Čechii, Słavakii, Polščy, Estonii i inšych krain.
— Valeryj maje biaźmiežny hołas, za jakim uhnacca vielmi składana navat prafiesijnym opiernym śpievakam. Ja vydatna pamiataju, jak pa jaho zapisach vučylisia tenary ŭ našym kaledžy pry kansiervatoryi. Dy i sama pieśnia patrabuje šyrokaha dychańnia i doŭhaj kancileny, tamu śpiavać jaje vielmi niaprosta, — kaža Silčukoŭ. — Ale adna z razynak našaj viersii — mienavita žanočy vakał Volhi Vaškievič, majoj kalehi pa Vialikim teatry Biełarusi.
31 sakavika — Minsk, Pałac sportu — 20:00
Kvitki: ad 63 rub, fan-zona — 73 rub.
Prodaž: Chg.by, Kvitki.by, Ticketpro.by
Infalinija: +375 44 722 87 40
