Pry prachodzie na stancyju mietro 45-hadovy minčuk pažartavaŭ, što ŭ jaho zaplečniku znachodzicca bomba, za što byŭ asudžany. Pra paviedamlajuć «Minsk-Naviny».

Poźnim viečaram u viestybiul stancyi mietro «Instytut kultury» zajšoŭ mužčyna. Kantralor adrazu źviarnuła na jaho ŭvahu — pasažyr byŭ vidavočna ŭ niećviarozym stanie. Jana pacikaviłasia jaho samaadčuvańniem i pra toje, što znachodzicca ŭ jaho ŭ zaplečniku. Toj adkazaŭ: «Bomba».

Inśpiektar słužby biaśpieki paprasiŭ mužčynu prajści ŭ pakoj dla dahladu, kab prapuścić pakłažu praź intraskop. Toj pasłuchaŭsia. Ubačyŭšy na ekranie niezrazumieły pradmiet z pravadami, supracoŭnik mietrapalitena jašče raz udakładniŭ jaho pryznačeńnie. Pasažyr znoŭ adkazaŭ, što heta vybuchovaje prystasavańnie. Tady dziažurny milicyjant adnios zaplečnik u asobnaje pamiaškańnie, dzie jaho nakryli śpiecsrodkam, jaki łakalizuje vybuch, i vyklikaŭ sapioraŭ.

Hrupa raźminiravańnia ničoha zabaronienaha ŭ ručnoj pakłažy nie znajšła: akazałasia, mužčyna prosta niaŭdała pažartavaŭ. Dabracca dadomu ŭ toj viečar jamu nie ŭdałosia — byŭ zatrymany. Sudovaha pasiadžeńnia jon čakaŭ u śledčym izalatary.

Mužčyna apynuŭsia raniej sudzimy, nidzie nie pracavaŭ i mieŭ admoŭnuju charaktarystyku pa miescy žycharstva. Da taho ž na momant ździajśnieńnia pravaparušeńnia jon sapraŭdy byŭ niećviarozy.

- Abvinavačanaha sudzili na padstavie č. 1 art. 340 KK Respubliki Biełaruś (Zahadzia iłžyvaje paviedamleńnie ab padrychtoŭcy vybuchu). Svaju vinu jon nie pryznaŭ, - raspavioŭ prakuror Kastryčnickaha rajona Juryj Trajkoŭski. - Adnak sud ŭličyŭ usie akaličnaści spravy, dapytaŭ śviedak i vynies vierdykt: 2 miesiacy aryštu.

Akramia taho, pa rašeńni suda pa pazovie prakurora z abvinavačanaha spahnany škodu, pryčynienuju zaviedama iłžyvym paviedamleńniem, a mienavita — vydatki, paniesienyja ŭ suviazi z vyjezdam sapiorna-piratechničnaj hrupy.

Клас
0
Панылы сорам
0
Ха-ха
0
Ого
0
Сумна
0
Абуральна
0