Fłarentyjskaja hazieta La Nazione ŭ sieradu vypuściła maleńki tekst pra vysakarodnaść Džanłuidžy Bufona.
Akazvajecca, na minułym tydni Džydžy i hałoŭny trenier «Juvientusa» Masimiliana Alehry apłacili pryvatny rejs z Łondana ŭ Fłarencyju, kab adrazu paśla pieramohi 8 sakavika nad «Totenchemam» u Lizie čempijonaŭ paśpieć na raźvitańnie z Davide Astory. 31-hadovy kapitan «Fijarenciny» pamior 4 sakavika pierad matčam čarhovaha tura čempijanata Italii.
Ledź zajšoŭšy ŭ raspranalniu «Uembli» paśla pieramohi nad «Totenchiemam», Bufon skazaŭ hulcam «Juvientusa»: «My znajšli pryvatny samalot, kab dabracca da Fłarencyi, dzie zaŭtra raźvitvajucca z Davide. Kali niechta choča dałučycca, spuskajciesia ŭ łobi hatela da 04:30 ranicy. Vydatna razumieju tych, chto stamiŭsia i zachoča paspać paśla takoj hulni».
A pałovie na piatuju na pieršym paviersie stajali praktyčna ŭsie hulcy «Juvientusa». Ale palacieć u Fłarencyju mahli tolki 9 čałaviek: samalot maleńki i nie moža źmiaścić bolš. U vyniku na pachavańnie adpravilisia Alehry, Bufon, Kjelini, Bienatyja, Pjanič, Bardzalji, Markizia, Ruhani i pamočnik hałoŭnaha treniera Marka Łandučy. Užo ŭ Fłarencyi da ich dałučyŭsia Fiederyka Biernardeski, jaki nie lataŭ na matč z «Totenchemam» z-za traŭmy.
Palicyja prapanoŭvała hulcam i trenieram «Juve» ŭvajści ŭ baziliku Santa-Kroče z čornaha ŭvachodu, ale Bufon admoviŭsia. Džanłuidžy zaklikaŭ usich hulcoŭ źjavicca pierad žycharami Fłarencyi na płoščy, kab padtrymać ich i pakazać, što «Juvientus» ź imi ŭ hety ciažki momant.
