Čynoŭniki ź Ministerstva transpartu i kamunikacyj Biełarusi raspaviali, chto byŭ inicyjataram źmienaŭ u zakon ab aŭtapieravozkach.

Jak viadoma, z 26 lutaha z-za hetaha novaŭviadzieńnia źmianiajecca schiema pracy mižharodnich maršrutak, a niekatoryja pieravozčyki prypynili pajezdki. Na «zasille» «nierehularnych pieravozčykaŭ» paskardzilisia «mnohija transpartnyja kampanii» — aficyjnyja rehularnyja pieravozčyki. Pra heta na pres-kanfierencyi ŭ Minsku zajaviŭ namieśnik ministra transpartu i kamunikacyj Alaksandr Šyško. Pavodle jaho słoŭ, u skarhach adznačałasia, što pieravozčyki karystalisia «niedaskanałym zakanadaŭstvam» i vykonvali rehularnyja rejsy, nie majučy na heta licenzii. Z-za hetaha «aficyjnyja pieravozčyki apynulisia ŭ zaviedama niaroŭnych umovach».

Namieśnik ministra pryznaje, što z-za ŭstupleńnia ŭ siłu novaŭviadzieńniaŭ na niekatorych nakirunkach źniziłasia kolkaść maršrutak (niekatoryja pryvatniki spynili pajezdki). I Mintrans pracuje nad tym, kab «źniać napružanaść». Šyško nazvaŭ najbolš prablemnyja harady — Navapołack, Połack i Salihorsk. I kali maršrutki nie adnoviać rejsy, «buduć pryniatyja ŭsie miery, kab zabiaśpiečyć pieravozkami pasažyraŭ».

U toj ža čas čynoŭnik adznačyŭ, što maršrutčykam nichto nie zabaraniaje vydavać bilety pasažyram, zabirać ich z prypynkaŭ, ale adpraŭlacca jany abaviazanyja z… vakzałaŭ ci z dyśpietčarskich stancyj, paviedamlaje Jeŭraradyjo sa spasyłkaj na sb.by.

Клас
0
Панылы сорам
0
Ха-ха
0
Ого
0
Сумна
0
Абуральна
0