Były palitviazień i kandydat u prezidenty Mikałaj Statkievič prakamientavaŭ prapanovy ŭładaŭ adnosna śviatkavańnia Dnia Voli ŭ centry horada, ale biez šeścia pa vulicach.

«Ja heta pakul što nazyvaju «nibyta prapanovy». Aficyjnaha adkazu my nie atrymali, nichto nie vyklikaŭ na razmovu zajaŭnikaŭ akcyi. Heta ŭsio było skazana tolki adnamu ź siabroŭ arhkamiteta. Maŭlaŭ, admoŭciesia ad šeścia pa centry horada na karyść mitynha i kancerta ŭ parku Janki Kupały. My budziem abmiarkoŭvać hetyja «prapanovy» siońnia ŭviečary.

Kali brać Dzień Voli, to heta dzień svabody. I Dzień Voli ŭ baraćbie za našuju svabodu. My zaŭsiody zmahalisia za niezaležnaść u hety dzień, demanstravali svaju rašučaść, u tym liku praz šeście. Za vyklučeńniem tolki tych hadoŭ, kali ŭłady hvałtam spyniali šeści, jak było letaś.

Pahroza našaj niezaležnaści nie pamianšajecca. Mahčyma, z časam budzie navat pavialičvacca. I siońnia vielmi važna prademanstravać hetuju rašučaść. Heta lamanty napałochanych, stomlenych ludziej: «Davajcie śviatkavać!» Kali my budziem tolki śviatkavać, to moža akazacca, što śviatkavać niama čaho i Biełaruś straciła niezaležnaść.

Maja pazicyja, što śviatkavańnie 100-hodździe BNR pavinna pakazać rašučaść biełarusaŭ u abaronie niezaležnaści krainy. Farmat śviatkavańnia pavinien adpaviadać hetaj mecie.

Šeście pavinna być. Kali heta ŭsio ž prapanova, to ja vitaju hatovaść uładaŭ da kampramisaŭ. Ja hatovy pryniać ich prapanovu nakont miesca zaviaršeńnia akcyi ŭ parku. Naturalna, što płošča Svabody bolš adpaviadaje i miescam, i nazvaj, ale, kali ŭłady iduć nasustreč, to što ž, my možam zrazumieć ich matyvy.

Chaj mianie asudziać kalehi, ale ja hatovy pryniać hetaje miesca dla zaviaršeńnia akcyi. Usio ž žyćcio časam patrabuje kampramisaŭ. Ja b pahadziŭsia na Opierny, jak miesca zaviaršeńnia. My mahli prajści šeściem ad płoščy Jakuba Kołasa da Opiernaha — heta maja pazicyja.

Ja nie razumieju kiraŭnikoŭ palityčnych partyj, jakija ŭchapilisia za ŭkinutaje mierkavańnie, što «davajcie śviatkavać». A davajcie pojdziem harełku pić pa chatach. Kali łaska, idzicie! U kaho jość mužaść i hodnaść, to davajcie razam prajavim jaje, a paśla pojdziem u kaviarni. U kaho niama mužnaści i hodnaści, to idzicie adrazu pić. I nie zaminajcie tym, chto zachavaŭ u sabie hetyja jakaści».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?