U listapadzie 2016 hoda ŭ milicyju pryjšła žančyna — u jaje źnik brat. Jaho pačali šukać. Siońnia śledčyja ŭpeŭnienyja: mužčynu zabili. Znajšli jaho aŭto sa śladami kryvi, znajšli navat padazravanych. Dzie cieła mužčyny, nieviadoma i pa siońnia.

Źnik na darahim aŭto

Uvosień 2016 hoda svajaki niekalki dzion nie mahli znajści 41-hadovaha Andreja Kasiaka. Paśpiachovy mužčyna, načalnik adździeła prodažaŭ adnoj ź minskich kampanij raptam źnik. Nie było i jaho mašyny — darahoha ŭsiedarožnika «Aŭdzi Q7».

Milicyjanty zaviali kryminalnuju spravu, svajaki pajšli da pošukava-ratavalnych atradaŭ. Mužčynu znajści nie atrymlivałasia.

«Padčas adpracoŭki znajomych źnikłaha pastupiła infarmacyja ad adnaho ź ich, što Kasiak byŭ u Sankt-Pieciarburhu. Pryčym niejkaja asoba paćvierdziła pa telefonie, što jon sapraŭdy pryjazdžaŭ da jaje ŭ hości», — raskazvajuć u Śledčym kamitecie.

Ale praź niekatory čas u Minskim rajonie byŭ znojdzieny aŭtamabil Aŭdzi Q7 i pry jaho ahladzie byli zafiksavanyja ślady zabojstva. U chodzie dalejšaj pracy viersija zabojstva atrymała paćvierdžańnie.

Viersija śledstva: zabili za hrošy

Pa viersii SK, padziei raźvivalisia nastupnym čynam.

29-hadovy raniej sudzimy žychar Minska uvajšoŭ u davier da Andreja i padtrymlivaŭ ź im pryjacielskija adnosiny. 41-hadovy mieniedžar vioŭ davoli zamkniony ład žyćcia, ale novy «siabar» da vosieni 2016 hoda ŭžo navat viedaŭ bližejšyja płany Kasiaka. Viedaŭ jon i toje, što Andrej płanavaŭ nabyć novy ŭsiedarožnik: chacieŭ kupić «Tajotu Łend Kruzier» za 40-50 tysiač dalaraŭ.

Akramia taho, ličać śledčyja, 29-hadovy mužčyna viedaŭ, dzie ŭ domie Kasiaka znachodziacca inšyja hrošy.

U vyniku «siabar» Andreja Kasiaka źviazaŭsia sa svaim znajomym, jaki byŭ haspadarom piejntbolnaha kłuba. Razam mužčyny raspracavali płan zabojstva. «Mozham» apieracyi, upeŭnienyja ŭ SK, byŭ mienavita 41-hadovy haspadar piejntbolnaha kłuba.

Zhodna z płanam, małodšy abvinavačvany ŭhavaryŭ Kasiaka pajechać ranicaj 4 listapada 2016 hoda ŭ piejntbolny kłub u Minsku, dzie pavinien byŭ paznajomić z čałaviekam, nibyta hatovym zabrać sabaku paciarpiełaha — toj chacieŭ addać jaho ŭ dobryja ruki.

Jany ŭdvaich pryjechali da zabaŭlalnaha kompleksu, dzie ich užo čakaŭ uładalnik.

Dalej, pakul haspadar adciahvaŭ uvahu mieniedžara, 29-hadovy minčanin nanios zzadu ŭdar małatkom pa hałavie hościu. Raźlik byŭ na toje, što jon nie budzie čakać napadu ciškom ad svajho znajomaha. Adnak, udar akazaŭsia niedastatkovym i paśla taho, jak mužčyna zvaliŭsia, uładalnik kłuba pačaŭ jaho dušyć.

Zatym pačałasia praca pa źniščeńni dokazaŭ i stvareńni alibi.

Akramia standartnych dziejańniaŭ nakštałt spalvańnia asabistych rečaŭ i začystki miesca złačynstva (da jakich taksama pryciahnuli syna ŭładalnika kłuba), fihuranty pasprabavali prajavić aryhinalnaść. Naprykład, u tuju ž ranicu adzin z abvinavačanych pryjechaŭ na mašynie paciarpiełaha da jaho pracy razam z mabilnymi telefonami, kab ich sihnał byŭ zafiksavany ŭ hetaj miascovaści ŭ patrebny pramiežak času.

Na značnaj adlehłaści ad miesca zabojstva złačyncy pavykidvali mabilnik i małatok, jakim zabili Andreja.

Paśla zabojstva «naparniki» zavałodali klučami ad doma zabitaha. Jany pranikli tudy i vynieśli 50 tysiač dalaraŭ. Dziejničali vielmi akuratna — paśla navat svajaki Kasiaka nie mahli skazać, što ŭ domie byli čužyja.

Nočču na «Aŭdzi» Andreja jaho cieła vyvieźli i zakapali. Dzie — nieviadoma i pa siońnia.

«Naparniki» prydumali i što zrabić z mašynaj mieniedžara — jašče da zabojstva damovilisia ab jaje razborcy i prodažy pa zapčastkach. Adnak aŭtaślesary zapadozryli niadobraje, admovilisia joj zajmacca, tamu niatannuju «Aŭdzi» prosta pakinuli ŭ adnym z nasielenych punktaŭ Minskaha rajona.

Machlary i vymahalniki

Mašynu znajšli praź miesiac za dapamohaj vałancioraŭ ratavalnaha atrada «Anhieł». U sałonie była kroŭ Andreja Kasiaka i bijałahičnyja ślady jaho 29-hadovaha «siabra». Raniej ź im užo havaryli, mienavita jon raskazvaŭ, što Kasiak — u Rasii.

Padazravanaha zatrymali. Paźniej zatrymali i taho haspadara pejntbolnaha kłuba.

Zatym jany zahavaryli. Kožny pierakładvaŭ vinu na tavaryša.

«Jość fakty, jakija śviedčać pra toje, što złačynstva było spłanavana zahadzia. Znajomy paciarpiełaha zahadzia uziaŭ sabie na pracy vychadny na 4 listapada, a ŭładalnik piejntbolnaha kłuba paprasiŭ svajho syna ničoha nie płanavać na hety ž dzień, tłumačačy heta tym, što dapamoha syna spatrebicca ŭ kłubie. Uličvajučy, što jany mieli źviestki ab chutkaj ŭstanoŭcy ŭ domie zahinułaha sistemy videanazirańnia, abvinavačanyja razumieli, što mienavita ŭ hety dzień u ich jość šaniec pakinuć paśla siabie mienš śladoŭ», — kažuć śledčyja.

Abodva abvinavačanych pakazali, dzie vykinuli małatok. Jaho znajšli.

«Uładalnik kłuba praciahvaŭ davać pakazańni ŭ ramkach svajoj viersii padziej. Navat pakazaŭ prybliznaje miesca pachavańnia cieła (dzie jano, zrešty, tak i nie było znojdziena).

Ale kali śledstvam było vyśvietlena, što jaho syn sapraŭdy nie viedaŭ ab płanach baćki dy jaho znajomaha i nie braŭ udzieł u zabojstvie, jaho vyzvalili z-pad varty. Tady 41-hadovy abvinavačany całkam źmianiŭ liniju pavodzinaŭ i zamoŭk, — kažuć śledčyja. — Pakazańni małodšaha saŭdzielnika nieadnarazova mianialisia da taho, jak jon taksama pierastaŭ supracoŭničać sa śledstvam, ale sutnaść ich padobnaja — usio budujecca vakoł taho, što zabivaŭ nie jon».

Padčas rascledavańnia uspłyli cikavyja fakty pra abvinavačanych. Raniej jany ŭžo paśpieli «zarabić» 100 tysiač dalaraŭ.

«Atrymanyja dokazy ich dačynieńnia da vymahalnictva hrašovych srodkaŭ u siamiejnaj pary ź Minska, spałučanyja z vykradańniem žonki. Pry hetym starejšy fihurant zapałochvaŭ ich pradmietami, jakija byli padobnyja na amputavanyja častki cieła čałavieka. Na praciahu troch hadoŭ im udałosia atrymać ad paciarpiełych 100 tysiač dołaraŭ, — paviedamlajuć u SK.

Akramia taho, małodšamu fihurantu inkryminujecca machlarstva, a starejšamu abvinavačanamu taksama padrobka dakumientaŭ».

Ciapier materyjały spravy nakiravali ŭ sud. Ale abvinavačanyja nie kažuć, dzie znachodzicca cieła, — spadziajucca, što heta dapamoža im paźbiehnuć pakarańnia.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?