Abnarodavany vytrymki ź piśma Alaksandra Łukašenki ŭ adras prezidenta Mižnarodnaha alimpijskaha kamiteta Tomasa Bacha ŭ suviazi ź situacyjaj vakoł sudziejstva vystupleńnia biełaruskaha frystajlista Antona Kušnira na Alimpijadzie ŭ Pchiončchanie. Heta infarmacyja ahučana ŭ prahramie «Hałoŭny efir» na telekanale «Biełaruś 1».
«Usia biełaruskaja spartyŭnaja hramadskaść, a taksama pradstaŭniki mižnarodnaj supolnaści, viadučyja spartsmieny i śpiecyjalisty frystajła sychodziacca na dumcy, što takoje dziejańnie mieła na mecie adchileńnie adnaho ź lidaraŭ suśvietnaha ŭzroŭniu ad udziełu ŭ zaklučnaj stadyi spabornictvaŭ», — havorycca ŭ piśmie. U im taksama źmieščana prośba da Tomasa Bacha jak prafiesijanała i haranta zachavańnia mižnarodna pryznanych pryncypaŭ alimpizmu apieratyŭna pryniać usie miery i zabiaśpiečyć niepraduziataje i kampietentnaje daśledavańnie vystupleńnia Antona Kušnira ŭ duchu vyšejšaj spartyŭnaj spraviadlivaści fejr-płej.
Čytajcie taksama: Kušnir nie trapiŭ u finał, prajhraŭšy šviejcarcu 0,45 bała. Taho ciahnuŭ napierad šviejcarski sudździa
«Mnie daviałosia nočču padniać pa tryvozie MZS, zadziejničać pasolstva ŭ Respublicy Kareja. Nakiravać nieadkładna ŭradavuju telehramu ŭ adras Bacha. Vykazaŭ jamu ŭsio, jak ja dumaju, u miakkaj formie. My heta ŭsio abnarodujem. My chavać heta nie budziem», — patłumačyŭ Alaksandr Łukašenka.
Jon nastrojeny paŭdzielničać u adnoj z nastupnych siesij MAK, kab uźniać prablemnaje pytańnie: «Dumaju, što mnie treba tam u bližejšy čas pabyvać, kab heta sonnaje palityzavanaje carstva krychu razvarušyć. Zanadta dobra žyviecca. Dzielać hetych ludziej zahadzia pa ranhach i pačynajuć dzialić miedali: chto macniejšy palityčna, toj i atrymlivaje miedal. Tak być nie pavinna!» — adznačyŭ jon.
Havoračy ab vystupleńni Antona Kušnira i niespraviadlivym sudziejstvie, Łukašenka skazaŭ: «Jany prosta, ščyra vam skažu jak čałaviek, jaki krychu ŭ hetym raźbirajecca, vykinuli hałoŭnaha kankurenta ź finału». Siarod členaŭ sudziejskaj kalehii byli ŭ tym liku pradstaŭniki Rasii, Kitaja i Šviejcaryi. «Usie jany praciahnuli ŭ finał svaich spartsmienaŭ», — zaŭvažyŭ jon.