Ekanamist, były kandydat u prezidenty Jarasłaŭ Ramančuk staŭ kałumnistam prarasijskaha sajta «Teleskop». Hety sajt redahuje były supracoŭnik Infarmacyjna-analityčnaha centra Leŭ Kryštapovič, a stałym aŭtaram źjaŭlajecca Kirył Aviarjanaŭ-Minski, adzin z najbolš viadomych biełarusafobaŭ u siońniašniaj Rasii.
Jarasłaŭ Ramančuk. Fota Siarhieja Hudzilina.
Ludzi kštałtu Aviarjanava-Minskaha admaŭlajuć biełaruskaj nacyi ŭ isnavańni, jany ličać, što biełarusy — heta častka «tryadzinaha ruskaha naroda». Viaduć zmahańnie ź biełaruskaj movaj i biełaruskimi hierojami. Bahata publikacyj na «Teleskopie» byli suprać kiraŭnika paŭstańnia 1863—1864 Kastusia Kalinoŭskaha.
Ciapier «Teleskop» viadzie aktyŭnuju baraćbu suprać śviatkavańnia 100-hodździa BNR. Pryčym dla hetaha jany vykarystoŭvajuć i apazicyjanieraŭ. Jak, naprykład, było z adnym z kiraŭnikoŭ partyi «Spraviadlivy śviet» Valeryjem Uchnalovym.
Ramančuk u razmovie z «NN» pryznaŭ, što publikacyja «Tarmazin dla Biełarusi» naležyć jamu. Pry hetym jon adznačaje, što nie duža cikavicca źmiestam hetaha sajta. Maŭlaŭ, publikacyi ŭ jaho zamaŭlaje «niejkaja dziaŭčynka», čyjo proźvišča jon nie pamiataje.
«Pakažycie kankretna, što antybiełaruskaha piša hety sajt? — pytaŭsia Ramančuk. Paśla niekalkich prykładaŭ, jon skazaŭ. — Dobra, ja pahladžu, kab nie ŭlapacca ŭ što-niebudź prykraje».
