U Biełarusi źjaviłasia novaja raznavidnaść kibierzłačynstvaŭ — kradziež hrošaj abanientaŭ sotavaj suviazi praz mabilny bankinh. Hrošy kraduć praz smartfon paciarpiełaha, adznačajuć u MUS. U viedamstvie raspaviali, jak praduchilić kradziež hrošaj z telefona.

— Złamyśniki šukajuć achviar u hramadskich miescach, a časam prosta źviartajucca da svaich znajomych, i prosiać telefon, kab patelefanavać, — raspavioŭ namieśnik načalnika ŭpraŭleńnia pa raskryćci złačynstvaŭ u śfiery vysokich technałohij kryminalnaj milicyi MUS Uładzimir Zajcaŭ.

— Kali aparat traplaje ŭ ruki afierysta, jon robić vyhlad, što nabiraje numar, a nasamreč pry dapamozie USSD-zapytu abo vychadu ŭ internet aktyvuje pradastaŭlenuju niekatorymi apieratarami sotavaj suviazi pasłuhu mabilnaha bankinhu.

Jana dazvalaje ažyćciavić apieracyi z asabistaha rachunku abanienta i atrymać u apieratara sotavaj suviazi limitavany mikrazajm. Suma, jakaja pastupiła haspadaru hadžeta, u niekalki dotykaŭ pieravodzicca na rasijskija abanienckija numary abo bankaŭskija rachunki. Tudy ž mohuć syści i srodki z bałansu mabilnaha telefona. Usio heta zajmaje litaralna paru chvilin.

Śpiecyjalist dadaje, što «ŭ vyniku hramadzianie mała taho, što zastajucca biez hrošaj, tak jašče vymušanyja pahašać mikrazajm razam z pracentami i ŭnosić abanienckuju płatu za vykarystańnie mabilnaha bankinhu».

U MUS adznačajuć, što hety vid kradziažoŭ źjaviŭsia ŭ kancy minułaha hoda.

— Litaralna praź miesiac supracoŭniki padraździaleńniaŭ pa raskryćci złačynstvaŭ u śfiery vysokich technałohij užo praviali zatrymańni datyčnych da hetaha asob. Dvoje mužčyn pa papiaredniaj zmovie zajmalisia takoj dziejnaściu ŭ Minsku i Mahilovie. Jość nie mienš za piatnaccać paciarpiełych. Jość padstavy mierkavać, što epizodaŭ było značna bolš. Pakul ža ahulnaja suma škody składaje bolš za 2 tys. rubloŭ, — dadaŭ Uładzimir Zajcaŭ.

Kab zaścierahčy siabie, u MUS rajać nie pieradavać telefon inšym ludziam, navat pryjacielam i ŭstalavać na smartfonie błakavańnie (z dapamohaj PIN-koda, parola, hrafičnaha kluča, skaniera adbitka palca, fejskantrolu).

— Nie hublaje aktualnaści prablema machlarstvaŭ u sacyjalnych sietkach. Złamyśniki damahajucca svaich metaŭ roznymi sposabami. Naprykład, uzłomvajuć čužyja akaŭnty abo stvarajuć poŭnyja dublikaty asabistych staronak hramadzian, karystajučysia infarmacyjaj i fatahrafijami z adkrytaha dostupu, a zatym ad imia hetych ludziej rassyłajuć paviedamleńni ich virtualnym siabram z prośbami ab finansavaj dapamozie.

Zvyčajna zhadvajuć nievialikuju — ad 10 da 50 rubloŭ — sumu, jakuju treba pieravieści na kart-rachunak, elektronny kašalok, bałans mabilnaha telefona, — kaža Uładzimir Zajcaŭ.

Śpiecyjalist raspaviadaje, što ašukancy sprabujuć daviedacca rekvizity bankaŭskaj apłatnaj karty karystalnika, ź jakim viaduć pierapisku sa uzłamanych abo fejkavych staronak.

— Niebiaśpieka zaklučajecca nie tolki ŭ tym, što atrymaŭšy ŭsie nieabchodnyja dadzienyja, złamyśniki mohuć abčyścić kart-rachunak abo bałans mabilnaha telefona. Zhadžajučysia dać rekvizity bankaŭskaj karty abo svoj numar, hramadzianie ryzykujuć vystupić u jakaści pasiarednika pry pieravodzie hrošaj inšaha paciarpiełaha ašukancu, što piša z fejkavaj staronki i, jak praviła, jaki znachodzicca za miežami Biełarusi, - rastłumačyŭ Uładzimir Zajcaŭ.

U MUS rekamiendujuć pierš čym pieravodzić hrošy pa prośbie znajomaha, vyśvietlić, ci jon aŭtar padazronych paviedamleńniaŭ. Śpiecyjalisty taksama rajać nikomu nie paviedamlać rekvizity svajoj bankaŭskaj apłatnaj karty. «Taksama nielha raspaŭsiudžvać u internecie zdymki jaje piaredniaha i advarotnaha boku. Staronnija nie pavinny viedać i źviestki, atrymanyja ŭ sms-paviedamleńniach: kody dostupu i aktyvacyi, sieansavym klučy i inšaje. Heta taksama moža pryvieści da kradziažu hrošaj, zavałodańnia akaŭntami ŭ sacyjalnych sietkach abo elektronnymi paštovymi skryniami», — rajać u MUS.

Клас
Панылы сорам
Ха-ха
Ого
Сумна
Абуральна