Biełarusy Kanady źniali svoj pieršy (daj Boža, nie apošni!) film — muzyčnuju kazku «To-to-to» — i atrymali ščyraje zadavalnieńnie ad jaho na premjery ŭ Biełaruskim hramadzkim centry Taronta 10 lutaha 2018 h. Hety film — vydatny prykład taho, što moža zrabić talenavitaja i samaaddanaja kamanda scenarystaŭ, śpievakoŭ, aktoraŭ, aperataraŭ i mantažoraŭ.

Pa čyrvonaj darožcy pad fanfary i avacyi hledačoŭ prajšli ŭsie ŭdzielniki prajektu: vykanaŭcy hałoŭnych rolaŭ Inesa Cieraščuk, Łarysa Michajłava, Alaksandra Salenik, Źmicier Leanovič, Nadzieja Drobina, Ihar Ułasičaŭ, Ihar Filuškin, Ała Kaściučenka i Vijaleta Kavalova, artysty, jakija zdymalisia ŭ epizodach, vykanaŭcy vakalnych partyjaŭ, aperatary, mastaki i h.d. Usie aktory filma, a taksama ŭsie vakalisty — vykanaŭcy tarontaŭskaha śpieŭnaha hurta «Javarovy ludzi» (a taksama i «Javarovy dzieci»). A ŭ masavych scenach Kupalla zdymalisia žychary Taronta i vakolicaŭ.

«Javarovy ludzi» źniali hetaje kino pa matyvach adnajmiennaha muzyčnaha spektaklu, napisanaha samimi ŭdzielnikami hurta i ŭpieršyniu pakazanaha ŭ 2012 hodzie, na Sustrečy biełarusaŭ Paŭnočnaj Ameryki.

U filmie jość kadry dla ŭsich: tajamničyja viadźmarki i zahadkavyja handlary dla amataraŭ čaradziejnych kazak, ciomnyja siły dla prychilnikaŭ «žachlivikaŭ», drama i erotyka dla tych, chto lubić papłakać nad ščymlivaj historyjaj kachańnia, jość medytatyŭnaje jadnańnie z pryrodaj i navat dapamožnik pa tkactvie pajasoŭ. Čaho ŭ im niama, dyk heta biessensoŭnaha hvałtu i biazhłuzdaha «mačyłava».

 

Niahledziačy na fejeryju muzyki i tancaŭ (chacia i nie ŭ balivudzkim styli!), film atrymaŭsia adnaznačna biełaruskim. A sapraŭdny hałoŭny hieroj hetaj videastužki — biełaruskaja narodnaja pieśnia, i jaje amataraŭ film nie pakinie abyjakavym. Ad śviežaj viersii ŭsim viadomaj «Kupalinki» muraški biahuć pa śpinie, kolki b razoŭ jaje ni słuchaŭ. U filmie prahučała vasiemnaccać biełaruskich narodnych pieśniaŭ, i nivodnaja ź ich nie była skaročana dziela «zručnaści» mantažu. Usie pieśni, muzyku i huk dla «To-to-to» zapisaŭ i źvioŭ hukarežyser hurta «Javarovy ludzi» Ihar Filuškin. Kiraŭnik hurta Vijaleta Kavalova admysłova dla filmu zrabiła aranžyroŭki niekatorych pieśniaŭ, a taksama instrumentalnyja apracoŭki biełaruskich melodyjaŭ. Fanahrama tancu «Padespań» była zapisanaja vykanaŭcami mienskaha hurta «Vierbica» i vykarystanaja ŭ filmie ź ich łaskavaj zhody.

Na premjeru kino 10 lutaha ŭ biełaruski centr sabrałosia bolš za 70 čałaviek.

 

Łarysa Michajłava: «Daŭno ŭ mianie nie było takoho dobraha nastroju, jak paśla prahladu filmu! Asabista dla mianie hety film budzie chronikaj najlepšych momantaŭ majho kanadyjskaha žyćcia, źviazanaha ź «Javarovymi ludźmi». Vielmi pryjemna było ŭzhadvać, jak heta ŭsio adbyvałasia! Kolki cikavych uspaminaŭ, źviazanych i z Kupallem, i z Haj-parkam, i z chamutom:) Hety film budzie najlepšym srodkam suprać sumnaha nastroju ŭ budučyni!»

«Ci varta kazać, što ŭvieś prajekt byŭ realizavany dziakujučy nievyčerpnaj enerhii i šyle ŭ adnym miescy ŭ našaha biasstrašnaha kiraŭnika Vijalety Kavalovaj», — kaža Ihar Filuškin

«Vialiki dziakuj Iharu i Vijalecie, režyseram i mantažoram filmu, za doŭhuju i składanuju pracu! I asobny dziakuj za toje, što jany ŭ jakaści bonusa zrabili «film pra film» — pakazali, jak zdymalisia epizody. Heta było supier, śmiešna, talenavita», — zaznačaje Źmicier Leanovič.

U dalejšych planach stvaralnikaŭ «To-to-to» — vypusk DVD, aŭdyjodysku z saŭndtrekam da filmu, a taksama padrychtoŭka versii z anhielskimi subtytrami i anhielskim zakadravym tekstam.

Клас
Панылы сорам
Ха-ха
Ого
Сумна
Абуральна