Śledčy kamitet druhi raz spyniŭ spravu Arcioma Baściuka — sałdata terminovaj słužby, znojdzienaha paviešanym u vajskovaj častcy №25849 pad Barysavam. Na dumku śledčych, 25-hadovy minčuk ździejśniŭ samahubstva.
«My atrymali pastanovu. Tam usio pieraviarnuli z noh na hałavu. U nas była vočnaja staŭka z kamandzirami čaści — ich słovy pieraviernutyja tak, nibyta ich uziali ź inšaj spravy, — raspaviadaje Jeŭraradyjo Taćciana Baściuk, maci Arcioma. — Adkazali nam, što ŭ vojsku ledź nie dziciačy sad, a naš syn sam zachacieŭ — i ŭsio».
U pačatku kastryčnika 2017 hoda SK užo spyniaŭ spravu Baściuka. Heta adbyłosia praź niekalki dzion paśla taho, jak stała viadoma pra śmierć u Piečach jašče adnaho sałdata terminovaj słužby — 21-hadovaha pinčuka Alaksandra Koržyča. Pad ciskam žurnalistaŭ spravu praź niekalki dzion uznavili. Ale zaraz jana zakrytaja iznoŭ.
6 lutaha staršynia Śledčaha kamiteta Ivan Naskievič zajaviŭ žurnalistam, što śledčyja vyjavili novyja fakty dziedaŭščyny ŭ biełaruskim vojsku i pačali niekalki novych spravaŭ.
Advakat Taćciany i Siarhieja Baściukoŭ rychtujecca abskardžvać pastanovu ab zakryćci spravy pa fakcie śmierci ich syna.
Arciom Baściuk rehularna skardziŭsia baćkam na dziedaŭščynu ŭ čaści. Jon raspaviadaŭ, što «dziady» prymušali «maładych» kuplać im kavu, cukar, cyharety, nie dazvalali spać. Za nievykanańnie zahadu prymušali adciskacca sotni razoŭ.
Chłopiec nie vytrymaŭ i staŭ skardzicca na niestatutnyja ŭzajemaadnosiny kiraŭnictvu čaści. 30 sakavika, za dzień da jaho hibieli, abmierkavać situacyju ŭ Barysaŭ pryjazdžali baćki Arcioma.
Ale ŭviečary taho ž dnia sałdat patelefanavaŭ dadomu, kab raźvitacca. Baćki zabili tryvohu i, u svaju čarhu, patelefanavali ŭ častku. Ich zapeŭnili, što ŭsio budzie dobra, ale ranicaj Arcioma znajšli ŭ piatli.
