Ilcham Alijeŭ (fota: Siarhiej Hryc / AP)
Vystupajučy na źjeździe kirujučaj partyi «Jeny Azierbajdžan», dzie Alijeva vyłučyli kandydatam u prezidenty, kiraŭnik dziaržavy zajaviŭ, što Jerevan źjaŭlajecca «histaryčnaj ziamloj» azierbajdžancaŭ, a tamu palityčnaj i stratehičnaj metaj źjaŭlajecca viartańnie ŭ hety horad, paviedamlaje ahienctva «Interfaks».
«Chaču adznačyć, što my nie pavinny zabyvać ab svaich histaryčnych ziemlach. U dalejšym heta pavinna być adnym z kirunkaŭ našaj dziejnaści. Našy histaryčnyja ziemli — Irevanskaje chanstva, Zienhiezur (Siunikskaja vobłaść Armienii. — RBK), Hiejče (voziera Sievan na terytoryi Armienii. — RBK), pra heta pavinna viedać jak naša maładoje pakaleńnie, tak i ŭvieś śviet», — adznačyŭ Alijeŭ.
Prezident Azierbajdžana ŭžo nie ŭ pieršy raz zajaŭlaje pra toje, što maje na mecie «viartańnie Jerevana». U lipieni minułaha hoda jon skazaŭ, što Nahorny Karabach i Armienija źjaŭlajucca «histaryčnymi azierbajdžanskimi ziemlami». «Nie tolki Nahorny Karabach, ale i ciapierašniaja terytoryja Armienii źjaŭlajucca histaryčnymi azierbajdžanskimi ziemlami. Nielha siońnia paraŭnoŭvać słabuju Armieniju z mocnym Azierbajdžanam», — skazaŭ Alijeŭ.
U śniežni 2015 hoda Alijeŭ, vystupajučy ŭ horadzie Terter, zajaviŭ, što «azierbajdžancy majuć namier viarnucca ŭ Jerevan mirnym šlacham». Patłumačyŭ jon heta tym, što žychary Armienii ŭ siłu niaprostych ekanamičnych umovaŭ pakidajuć krainu, a nasielnictva Azierbajdžana pavialičvajecca.
Vice-śpikier parłamienta Armienii Eduard Šarmazanaŭ u kamientary vydańniu News.am nazvaŭ zajavu Alijeva «niepiśmiennaj, durnoj, biessensoŭnaj i śmiešnaj». Pavodle jaho słoŭ, «nieprymalna, kali ŭ XXI stahodździ prezident adnoj krainy vykazvaje terytaryjalnyja pretenzii da susiedniaj krainy». Jon paraiŭ sustaršyniam Minskaj hrupy ABSIE źviarnuć uvahu na słovy Alijeva.
«Alijeŭ časta pra heta kaža — pra toj ci inšy armianski horad. Dumaju, što takija zajavy źviazany ź nieabchodnaściu pavialičyć narodnuju padtrymku, bo ŭ krainie chutka vybary i Alijevu treba jašče bolš hałasoŭ», — zajaviŭ RBK deputat armianskaha parłamienta Šyrak Tarasian.
