Nacyjanalnaje ahienctva pa turyźmie pastaviła vyšymajku na pieršaje miesca siarod suvieniraŭ, jakija varta turystu pryvieźci ź Biełarusi, a na telekanale ANT u repartažy pra turyzm u Biełarusi jak prykład kramy dla turystaŭ Hanna Pyž vykarystoŭvaje symbal.by i hałoŭny suvienir — taksama vyšymajku. Z hetaj nahody ja vam raskažu pra trochhadovy etap evalucyi vyšymajki ad «zmaharskaha» simvała da hałoŭnaha turystyčnaha suvienira ź Biełarusi.
Nie dumajcie, što vyšymajka ŭžo nie ŭ trendzie, u jaje ŭvieś čas źjaŭlajucca novaja stadyi, i mnie asabista vielmi cikava nazirać za hetymi stadyjami.
Pieršym byŭ uaŭ-efiekt, kali źjavilisia pieršyja fotki ŭ vyšymajkach i sotni pytańniaŭ «Dzie kupić? Dzie ŭziać?».
Padciahnulisia lidary mierkavańnia ŭ sacyjalnych sietkach, jakija atrymali hetyja majki i aktyŭny ich rekłamavali ŭ svaich sacsietkach.
Taksama paralelna rekłamavali hety pradukt svaimi fotkami ŭ sacsietkach pieršyja pakupniki i adpaviedna raspaviadali inšym, dzie ŭziali.
Pastupova pačali padciahvacca roznyja publičnyja asoby i zorki, źjaŭlacca jakasny vizualny kantent. Saša Jarasłaŭcaŭ dla ICON Magazine Belarus arhanizavaŭ jaskravy fotaset u vyšymajkach i sam źjaviŭsia ŭ joj na Belarus Fashion Week.
Dalej adbyłasia stadyja pryznańnia i šyrokaj virusnaj rekłamy. «Naša Niva» — pieršaja biełaruskaja hazieta — nazvała Franciška Viačorku, a ŭ jaho asobie ŭsich papularyzataraŭ vyšyvanki «Čałaviekam hoda» 2014 hoda. My atrymali hran-pry konkursu rekłamy «Adnak».
Novym etapam staŭ vychad za koła «svaich» i šyrokaja zapatrabavanaść vyšymajek. Źjaŭleńnie vialikaha popytu i pa-za Minskam.
Pačali źjaŭlacca šmatlikija karparatyŭnyja i indyvidualnyja zamovy na vyrab vyšymajek z dadatkovym upisańniem łahatypaŭ firmaŭ, stvareńnia ekskluziŭnych vyšymajek pad kankretnyja mierapryjemstvy i padziei.
Dalej pačaŭsia etap źjaŭleńnia kłonaŭ i remejkaŭ, na siońniašni dzień 10-ki firmaŭ robiać svaje vyšymajki.
Źjaŭlajucca tvorčyja pradukty z vykarystańniem vyšymajki: roliki błohieraŭ, klipy, kancertnyja vystupy, navat pieśniu Andrus Takindang zapisaŭ.
U 2016-m hodzie adbyłosia padchoplivańnie i pierajmańnie trendu «vyšymajki» dziaržavaj: Łukašenka źjaviŭsia ŭ vyšymajcy ad Mark Formelle, BRSM zrabiŭ svaje vyšymajki i ceły «Dzień vyšyvanki», Ministerstva zamiežnych spraŭ Biełarusi i inšyja dziaržaŭnyja ŭstanovy pačali pravodzić svaje tematyčnyja śviaty.
Pačałosia aktyŭnaje stvareńnie novych praduktaŭ «a la vyšymajka», a Marketing.by apublikavaŭ cełaje daśledavańnie pra «trend vyšyvanki» i ŭpłyŭ afarmleńnia tavaraŭ u nacyjanalnym styli na pakupnickuju zdolnaść.
Uvieś hety čas nie ścichała krytyka, analiz, acenka, vykazvańnie mierkavańniaŭ ad ekśpiertaŭ da etnohrafaŭ na roznych miedyja-placoŭkach, jak dziaržaŭnych, tak i nie dziaržaŭnych.
I zaraz novy etap — hałoŭny turystyčny pradukt dla haściej Biełarusi. U takija topy ŭžo traplajem nie pieršy raz.
Cikava taksama, što kožny z hety etapaŭ nie nazavieš skončanym. Usio novyja fakty źjaŭlajucca ŭ kožnaj z vyšej apisanych stadyj raźvićcia praduktu.
