Dakumient, zdabyty ahienctvam Rojterz.
Siarhieja Paddubnaha pachavali ŭ jahonaj rodnaj vioscy kala Rastova-na-Donie. Jahonyja svajaki raskazvajuć, što jon słužyŭ kantraktnikam u Siryi. U paśviedčańni ab śmierci havorycca, što jon zahinuŭ u pravincyi Choms 28 vieraśnia hetaha hoda.
Žurnalisty Rojterz źbirali śviedčańni pra rasijskich vajskoŭcaŭ, što pakłali hałovy ŭ Siryi. Pavodle aficyjnych źviestak rasijskaha Minabarony, za hety hod tam zahinuli 16 hramadzian Rasii. Adnak žurnalistam udałosia adšukać 26 pachavańniaŭ ludziej, čyje svajaki pryznalisia, što ich rodnyja stracili žyćcio ŭ Siryi.
Paddubny źviarnuŭ asablivuju ŭvahu rasśledavacielaŭ, bo ŭ hetym vypadku svajaki im pakazali paśviedčańnie ab śmierci. Numar 131 na im aznačaje, što heta 131-je takoje paśviedčańnie, vydadzienaje rasijskim pasolstvam u Damasku ŭ 2017 hodzie, śćviardžajuć žurnalisty.
Pavodle aficyjnaj infarmacyi, u Siryi apieracyju ažyćciaŭlajuć tolki rasijskija Pavietranyja siły, a taksama dziejničajuć rasijskija vajennyja daradcy. Niezaležnyja ekśpierty nazyvajuć takuju infarmacyju chłuśnioj i śćviardžajuć, što tam pad vyhladam bajcoŭ pryvatnaha vajennaha ahienctva znachodziacca prafiesijnyja rasijskija vajskoŭcy. U pryvatnaści, Rasija pryznała hibiel adnaho z hienierałaŭ.
