1. Mitsubishi pradstaviła elektrahruzavik z zapasam chodu 350 km

Niamiecki aŭtamabilebudaŭničy kancern Daimler, jakomu naležać 85% akcyj kampanii Mitsubishi Fuso Truck and Bus Corporation, pradstaviŭ elektryčny hruzavik budučyni pad brendam Mitsubishi E-Fuso Vision One. 

Zhodna z kanceptam, elektrahruzavik budzie mieć hruzapadymalnaść 11 ton i zapas chodu 350 km. Pakul heta tolki pratatyp, tamu bolš padrabiaznyja charaktarystyki hruzavika nie raskryvalisia. Pra najaŭnaść funkcyi aŭtapiłota taksama ničoha nieviadoma. Tym nie mienš, pradstaŭniki kampanii zajavili, što Mitsubishi E-Fuso Vision One vyjdzie ŭ sieryjny prodaž u 2020 hodzie, i da taho času jaho źniešni vyhlad i charaktarystyki mocna źmieniać i dapracujuć.

2-3. Toyota pakazała elektrakar dla invalidaŭ i trochkołavy elektraskutar

Adrazu dźvie niezvyčajnyja futurystyčnyja navinki prezientavała kampanija Toyota: nievialički elektrakar Concept-i Ride i trochkołavy elektraskutar Concept-i Walk. Testavańnie abiedźviuch madelaŭ u haradskich umovach pačniecca da 2020 hoda.

Concept-i Ride ŭjaŭlaje saboj dvuchmiesny elektramabil z całkam elektryčnaj ciahaj, stvorany śpiecyjalna dla ludziej z abmiežavanaj ruchomaściu. Navinka abstalavanaja adkryvanymi ŭhoru dźviaryma i admysłovym kranam dla zahruzki invalidnaha vazka. Zapas chodu mašyny — 100-150 km, a jaje štučny intelekt umieje adsočvać stan kiroŭcy i ŭklučać aŭtapiłot, kali toj stamiŭsia.

Concept-i Walk — trochkołavy elektrasamakat, jakim treba kiravać z dapamohaj śpiecyjalnaha džojścika. Na adnym zaradzie Concept-i Walk prajazdžaje da 20 km. Maksimalnaja jaho chutkaść budzie dasiahać 6,5 km/h, što dapamoža karystalniku padładzicca pad piešachodny trafik. 

4. Nissan prezientavała kancept elektrakara ź niejmaviernym zapasam chodu

Napiaredadni adkryćcia Takijskaha aŭtasałona kampanija Nissan pradstaviła elektryčny krasovier Nissan IMx Concept, stvorany na bazie novaj elektryčnaj płatformy, inavacyjnaść jakoj zaklučajecca ŭ niezaležnaj padviescy i mahčymaści stvareńnia paŭnapryvadnaha režymu. Nissan IMx Concept abstalavany dvuma elektryčnymi ruchavikami z kruciačym momantam 700 N·m i ahulnaj mahutnaściu 435 k.s. Zajaŭleny zapas chodu na adnym zaradzie akumulatara ŭražvaje: ažno 600 km!

Kancept elektrakara atrymaŭ abnoŭlenuju sistemu kiravańnia Nissan ProPILOT, jakaja moža sama znajści parkovačnaje miesca ŭ vyznačanym rajonie i pryparkavacca. Padčas vykarystańnia aŭtapiłota rul mašyny chavajecca, a pasažyrskija siadzieńni prymajuć amal haryzantalnaje stanovišča. Jość mahčymaść kiravać bartavym kampjutaram z dapamohaj žestaŭ i pozirku.

5. Spartyŭny elektramabil ad Honda

Na takijskim aŭtasałonie, jaki ŭ 2017 hodzie prachodzić z 27 kastryčnika pa 5 listapada, kampanija Honda pradstaviła kancept svajho spartyŭnaha elektrakara Honda Sports EV Concept. Jaho futurystyčnaść natchniaje. Ale kampanija zusim ničoha nie raspaviała pra jaho, akramia taho, što aŭtamabil budzie kiravacca sistemaj štučnaha intelektu, jaki, vidavočna, praduhledžvaje i najaŭnaść aŭtapiłota.

Darečy. Elektramabili spravakavali suśvietny deficyt mietałaŭ

U skład akumulatarnych batarej, jakija vykarystoŭvajucca ŭ elektramabilach, uvachodzić mnostva roznych materyjałaŭ: lityj, nikiel, kobalt, hrafit. Kolkaść aŭtamabilaŭ na elektryčnaj ciazie, jakaja raście vialikimi tempami, spravakavała rost koštaŭ na ŭsie hetyja materyjały, a košt kobaltu, jaki u asnoŭnym zdabyvajecca ŭ Konha, za apošnija paŭtara hoda uźlacieŭ ažno na 190%.

Ilustracyjnaje fota

Ilustracyjnaje fota

Praz palityku šmatlikich krain, źviazanuju z zabaronaj ciaham bližejšych dvuch dziesiacihodździaŭ aŭtamabilaŭ z ruchavikami ŭnutranaha zharańnia, analityki prahnazujuć nievierahodny rost kolkaści elektramabilaŭ u śviecie, u suviazi z čym aŭtavytvorcy śpiašajucca jak maha chutčej zaklučyć damovy ab pastaŭkach mietałaŭ dla akumulataraŭ.

Na hetym fonie ŭžo aktyvizavalisia finansavyja śpiekulanty, jakija aktyŭna nazapašvajuć patrebnyja dla elektryčnaj aŭtavytvorčaści kaštoŭnyja mietały tonami abo ŭkładvajucca ŭ ich zdabyču, bo vidavočna, što cana na ich budzie tolki raści. Analityki čakajuć, što na adzin tolki kobalt popyt da 2020 hoda vyraście pryblizna ŭdvaja, da 200 000 ton u hod, a na lityj da 2025 hodu — pavysicca na 779 000 ton, heta značyć u čatyry razy. 

Miž tym, suśvietnyja zapasy hetych mietałaŭ nie biaźmiežnyja, tamu vytvorcy akumulataraŭ užo imknucca pamienšyć kolkaść kobaltu ŭ svaich vyrabach. Tak, u vieraśni była pradstaŭlenaja batareja, jakaja vykarystoŭvaje lityj i nikiel, ale ŭtrymlivaje zusim niašmat kobaltu. Košt nikiela składaje adnu šostuju ad koštu kobaltu, pry hetym suśvietnych zapasaŭ nikiela prykładna ŭ 20 razoŭ bolš, i jon dapamahaje značna pavysić mahutnaść akumulatara.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?