Prezident Donald Tramp dazvoliŭ adnavić pryjom biežancaŭ u ZŠA pa zakančeńni čatyrochmiesiačnaha maratoryja, ale faktyčna padoŭžyŭ zabaronu na pradastaŭleńnie prytułku dla hramadzian 11 aficyjna nie nazvanych dziaržaŭ, jakija Bieły dom adnosić da hrupy ryzyki, paviedamlaje VVS.

U červieni paśla sieryi sudovych batalij Tramp zakryŭ ujezd dla biežancaŭ ź luboj krainy na 120 dzion, vykonvajučy adno z klučavych abiacańniaŭ svajoj pieradvybarnaj kampanii. Tady ž jon na 90 dzion zabaraniŭ ujezd hramadzianam Irana, Livii, Siryi, Samali, Sudana i Jiemiena, akramia tych, chto pracuje, vučycca ci maje blizkich svajakoŭ u ZŠA.

Sudździ nieadnarazova zhadžalisia z dovadami palityčnych apanientaŭ ciapierašniaj administracyi ab tym, što vybar krain, jakija padpali pad zabaronu, abumoŭleny pieradvybarnymi abiacańniami Trampa zakryć ujezd u ZŠA musulmanam, što samo pa sabie supiarečyła b amierykanskaj kanstytucyi.

Zabarona na ŭjezd z šaści krain skončyłasia ŭ kancy vieraśnia, a ŭ aŭtorak skončyłasia i zabarona na pryjom biežancaŭ, adnak Tramp uvioŭ novaje abmiežavańnie. Na bližejšyja 90 dzion pradastaŭleńnie prytułku hramadzianam 11 krain budzie surjozna abmiežavanaje, pakul administracyja nie raspracuje novyja, bolš žorstkija patrabavańni da pravierki ich zvarotaŭ.

Dziarždepartamient ZŠA nie ŭdakładniŭ, hramadzianie jakich krain zapatrabujuć asablivaj uvahi.

Ahienctva Rejter, spasyłajučysia na svaje krynicy i dakumient Dziarždepa, nazyvaje Jehipiet, Iran, Irak, Liviju, Mali, Paŭnočnuju Kareju, Samali, Sudan, Paŭdniovy Sudan, Siryju i Jiemien, a taksama palestyncaŭ, jakija žyvuć u hetych krainach.

Pavodle danych amierykanskich ŚMI, uzmocnienyja pravierki dla biežancaŭ z hetych krain buduć uklučać zbor dadatkovaj infarmacyi ab svajakach, miescach pracy i aktyŭnaści ŭ sacyjalnych sietkach.

Miesiac tamu Bieły dom paniziŭ hadavuju kvotu na pradastaŭleńnie prytułku zamiežnikam da 45 tysiač čałaviek — takoj nizkaj jana nie była ni razu z momantu zapusku prahramy ŭ 1975 hodzie.

Клас
0
Панылы сорам
0
Ха-ха
0
Ого
0
Сумна
0
Абуральна
0