24 kastryčnika adbyłosia adrazu niekalki kibieratak na rasijskija i ŭkrainskija kampanii. Siarod ich — vydańni «Interfaks» i «Fantanka», aeraport Adesy, kijeŭskaje mietro i Mininfrastruktury Ukrainy. Pakul niama paćvierdžańnia, što jany paciarpieli mienavita ad adnaho i taho ž virusa, ale ž ataki prajšli amal u adzin čas z roźnicaj u niekalki hadzin, paviedamlaje hi-tech.mail.ru.

Pakul nie viadoma, adkul źjaviŭsia virus, ale jość dźvie mahčymyja krynicy raspaŭsiudu Bad Rabbit. Pieršaja — jon raspaŭsiudžvajecca praz padroblenaje akno abnaŭleńnia dla Adobe Flash Player: šyfravalščyk traplaje na kampjutar pry zapampoŭcy fajła z novaj viersijaj płejera.

Ab druhoj krynicy raspaŭsiudžvańnia virusa paviedamiła Słužba biaśpieki Ukrainy. Pry napadach na ich viedamstvy vykarystoŭvałasia rassyłka pa elektronnaj pošcie. Złamyśniki pradstaŭlalisia słužbaj techničnaj padtrymki Microsoft i, miarkujučy pa ŭsim, prymacoŭvali da lista fajł ź virusam. Tak što možna mierkavać, što chakiery vykarystali adrazu niekalki mietadaŭ raspaŭsiudžvańnia virusa.

Voś, jak vyhladaje ekran zabłakavanaha kampjutara z paviedamleńniem virusa:

Pry zaražeńni kampjutar całkam błakujecca i na ekranie źjaŭlajecca tekst, jaki paviedamlaje, što ŭsie fajły zašyfravanyja, i daje instrukcyju dla viartańnia dostupu da ich. Treba pierajści pa spasyłcy na sajt, dzie nieabchodna zapłacić 0,05 bitkojna (kala 277 dalaraŭ na momant publikacyi artykuła), pry hetym abiacajecca, što ŭ vypadku apłaty kampjutar budzie abaviazkova razbłakavany.

Jak abaranić siabie?

Achviary sami zapampoŭvali virus Bad Rabbit, tamu ŭ metach biaśpieki treba być bolš uvažlivym pry adkryćci ŭvachodnych elektronnych listoŭ — jašče i jašče raz pierapravieryć adras adpraŭnika i źmiest. Časta złamyśniki ŭ listach pradstaŭlajucca supracoŭnikami viadomych kampanij abo imitujuć aŭtamatyčnuju rassyłku ad internet-servisu.

SBU rekamienduje ŭ naładach biaśpieki sistemy Windows zabłakavać dostup da damienu «x90.im». (Uvaha, zapuskać hety sajt na kampjutary moža być niebiaśpiečna! Imavierna, praz hety sajt chakiery raspaŭsiudžvajuć virus).

Taksama budzie karysnym ustalavać usie abnaŭleńni apieracyjnaje sistemy i antyvirusnych prahram.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?