Paŭnočna-Kaŭkazski akruhovy vajskovy sud RF vynies prysud 19-hadovamu ŭkraincu Arturu Panovu i 34-hadovamu rasijaninu Maksimu Smyšlajevu, abvinavačanym u padrychtoŭcy teraktu ŭ Rastovie-na-Donie.

Pra heta paviedamlaje «Miediazona».

Panova prysudzili da 8 hadoŭ kałonii, Smyšlajeva, jaki abvinavačvaŭsia ŭ dapamahańni teraryzmu, da 10 hadoŭ.

Panova abvinavacili ŭ padrychtoŭcy teraktu ŭ rastoŭskim teatry imia Horkaha. Padčas pieratrusu ŭ jaho, jak było abvieščana, była znojdziena samarobnaja bomba. Jon častkova pryznaŭ vinu, ale paźniej zajaviŭ, što zrabiŭ heta pad ciskam.

Žychar Rastova-na-Donie Maksim Smyšlajeŭ, pavodle viersii śledstva, byŭ pamahatym Panova.

Smyšlajeŭ vinu nie pryznaŭ; jon śćviardžaŭ, što adhavorvaŭ Panova ad hvałtoŭnych dziejańniaŭ.

Jak śćviardžaje rasijskaje śledstva, u kancy listapada 2015 Panoŭ i miascovy žychar sustrelisia ŭ Rastovie-na-Donie, dzie rastaŭčanin daviedaŭsia padrabiaznaści pra zapłanavany terakt, mahutnaść vybuchovaha prystasavańnia i kampanienty, ź jakich jano budzie vyrablena, a taksama pra mierkavanaje miesca ździajśnieńnia teraktu.

U pačatku śniežnia 2015 ukrainiec byŭ zatrymany supracoŭnikami pravaachoŭnych orhanaŭ. Rastaŭčanina zatrymali ŭ krasaviku 2016 hoda.

Клас
0
Панылы сорам
0
Ха-ха
0
Ого
0
Сумна
0
Абуральна
0