Paśla praviadzieńnia vajskovych vučeńniaŭ «Zachad-2017» častka rasijskich vajskoŭcaŭ moža zastacca na terytoryi Biełarusi, zajaviŭ u kamientary vydańniu «Hardon» lidar Biełaruskaha nacyjanalnaha kanhresa, apazicyjanier Mikałaj Statkievič.

«Navat kali imaviernaść pahrozy z boku RF składaje pracentaŭ 10, heta vyklikaje surjoznyja aściarohi. Heta žachliva vysoki pracent. Bo nie vyklučana, što nie ŭsie rasijskija vojski vyjduć ź Biełarusi paśla vučeńniaŭ i na terytoryi krainy zastaniecca ich vajskovaja baza. Jašče adzin varyjant — u Biełarusi zastaniecca ŭzbrajeńnie, jakoje rasiejskaja hrupoŭka zmoža vykarystoŭvać u budučyni. u lubym vypadku jość imaviernaść pravakacyj. My ž viedajem, što ŭ Rasii pryniata vyrašać unutranyja prablemy za košt dziejańniaŭ u inšych krainach. Tym bolš nie tak šmat času zastałosia da vybaraŭ prezidenta RF. Tamu my prajaŭlajem zaniepakojenaść», — adznačyŭ Statkievič.

Pavodle jaho słoŭ, siarod biełaruskich siłavikoŭ prezident RF Uładzimir Pucin karystajecca bolšaj papularnaściu, čym prezident Biełarusi Alaksandr Łukašenka.

«Režym Łukašenki žyvie całkam za košt rasijskich datacyj. Tamu ŭnutry Biełarusi jon pravodzić adpaviednuju infarmacyjnuju palityku. Našy siłaviki vychoŭvajucca jak filijał rasijskaj siłavoj struktury. Samy papularny palityk u siłavych struktur Biełarusi — heta Pucin, a nie Łukašenka», — padkreśliŭ apazicyjanier.

Na jaho dumku, u vypadku rasiejskaj ahresii Biełarusi budzie składaniej adstajać svaju terytaryjalnuju cełasnaść, čym Ukrainie.

«Rasijskija telekanały ŭ Biełarusi zajmajucca pramyvańniem mazhoŭ nasielnictva. I heta daje svoj vynik. Łukašenka, pa sutnaści, u abmien na rasijskija datacyi addaŭ Maskvie ŭsio, akramia farmalnych prykmiet suvierenitetu. Nas vielmi śmiešać fantazii ŭkrainskich palitołahaŭ, jakija bačać u Biełarusi niejki supraciŭ Rasii z boku Łukašenki. Ničoha takoha niama, heta prosta handal za datacyi. Abaranić Biełaruś moža tolki jaje narod. I nam budzie ciažej, čym va Ukrainie», — reziumavaŭ Statkievič.

Клас
0
Панылы сорам
0
Ха-ха
0
Ого
0
Сумна
0
Абуральна
0