Chryścijanski pastar adkapaŭ u rajonie Kona na ŭschodzie Śjera-Leone adzin z najbujniejšych u śviecie ałmazaŭ, paviedamlaje VVS.
Ilustracyjnaje fota: Reuters
Kaštoŭny kamień masaj 709 karataŭ, znojdzieny Emanuelem Momacham, ciapier zachoŭvajecca ŭ centralnym banku Śjera-Leone ŭ stalicy krainy Frytaŭnie.
Hety kaštoŭny kamień uvachodzić u dvaccatku najbujniejšych ałmazaŭ, viadomych čałaviectvu.
U bahatych ałmazami rajonach Śjera-Leone raspaŭsiudžanaja samatužnaja zdabyča.
Pastaru ŭdałosia zdabyć samy bujny dyjamient u Śjera-Leone za apošnija 45 hadoŭ. Da hetaha, u 1972 hodzie tam byŭ znojdzieny ałmaz vahoj 969 karataŭ, jaki atrymaŭ imia «Zorka Śjera-Leone».
Ałmaz, znojdzieny pastaram, u sieradu ŭviečary advieźli prezidentu krainy Erniestu Baj Karoma. Kiraŭnik dziaržavy «padziakavaŭ miascovamu kiraŭniku i jaho ludziam za toje, što jany nie vyvieźli ałmaz z krainy», paviedamlaje administracyja prezidenta.
Prezident taksama zajaviŭ, što ŭładalniki kapalni pavinny atrymać «toje, što im naležyć», a znachodka pavinna «prynieści karyść krainie ŭ cełym».
Śjera-Leone — adna z samych biednych krain śvietu, ale razam z tym jana bahataja ałmazami — kaštoŭnyja kamiani byli adnoj z krynic finansavańnia hramadzianskaj vajny ŭ Śjera-Leone.
U 2012 hodzie mižnarodny trybunał AAN pa Śjera-Leone prysudziŭ byłoha prezidenta Libieryi Čarlza Tejłara da 50 hadoŭ turemnaha źniavoleńnia: sud u Haazie pryznaŭ jaho vinu ŭ padtrymcy paŭstancaŭ z abjadnanaha Revalucyjnaha frontu ŭ Śjera-Leone padčas hramadzianskaj vajny 1991-2002 hoda.
U padziaku za padtrymku, pavodle viersii abvinavačvańnia, paŭstancy pierapraŭlali Tejłaru i jaho atačeńniu ałmazy, jakija z pryčyny ich pachodžańnia presa nazvała «kryvavymi».